Լոյս Տեսաւ Վազգէն Էթիեմեզեանի «Գրական Եւ Իմացական Էջեր» Հատորը

Համազգայինի Քանատայի շրջանի հրատարակչական հիմնադրամի «Օշական» մատենաշարին հրատարակութեամբ, լոյս տեսաւ վաղամեռիկ մտաւորական, գրող եւ հրապարակագիր Վազգէն Էթիեմեզեանի (1943-1996) «Գրական եւ իմացական էջեր» hատորը:

Յարութիւն Պէրպէրեանի խմբագրած գիրքը մէկ հատորի տակ կը համախմբէ Վազգէն Էթիեմեզեանի գրական ստեղծագործութիւնները եւ իմացական  յօդուածներն ու գրախօսականները, որոնք լոյս տեսած են «Ահեկան»-ի, «Սփիւռք»-ի, «Ազդակ»-ի,«Դրօշակ»-ի եւ «Բագին»-ի էջերուն մէջ, 1960-ականներէն 1985-ի միջեւ:

Յիշեցնենք, որ անցեալ տարի, Էթիեմեզեանի ծննդեան 80-ամեակին առիթով, Պէյրութի մէջ  լոյս տեսած էր «Շաբթուան մտածումը» գիրքը, ուր հաւաքուած էին Էթիեմեզեանի քաղաքական-քաղաքագիտական եւ ընկերային-իմաստասիրական յօդուածները, որոնք լոյս տեսած էին «Ազդակ Շաբաթօրեակ-Դրօշակ»-ի 1981-1985 տարիներու թիւերուն մէջ: