Լոյս է տեսել «Եւրոպայի հայկական լոպպին» արժէքաւոր աշխատութիւնը
Ուսումնասիրողների, խնդրով շահագրգիռ շրջանակների եւ ընթերցողների սեղանին է քաղաքական գիտութիւնների թեկնածու, ՀՅԴ Բիւրոյի Հայ դատի կեդրոնական գրասենեակի յատուկ ծրագրերի պատասխանատու Գէորգ Ղուկասեանի մենագրութիւնը՝ «Եւրոպայի հայկական լոպպին: Էթնիկ լոպպինկի էութիւնը եւ գործառնման համատեքստը» վերտառութեամբ:
Աշխատութեան նպատակն է վեր հանել էթնիկ լոպպինկի անդրազգային քաղաքական դերակատարութիւնը արդի քաղաքական գործընթացներում, գնահատել Եւրոպայի հայկական լոպպիի կառուցուածքա-գործառնական հնարաւորութիւնները, գործունէութեան առանձնայատկութիւնները, նոյնականացնել լոպպիստական սուբիէկտները եւ հասկանալ դրանց ազդեցութեան շրջանակն ու ՀՀ-ԵՄ յարաբերութիւններում դերակատարութեան հնարաւորութիւնը: Գնահատուել է էթնիկ լոպպինկի ինստիտուտի դերը քաղաքական արդիականացման գործընթացում:
Աշխատանքում միաժամանակ դիտարկուել են էթնիկ լոպպինկի հնարաւորութիւնները՝ հանդէս գալու իբրեւ «փափուկ ուժի» գործառնող, բացայայտուել են մուլտիկուլտուրալիզմի արժեհամակարգային պայմաններում լոպպինկի դրսեւորման հնարաւորութիւնները, համակարգային յատկորոշման է ենթարկուել «հայրենիք-սփիւռք-ընդունող պետութիւն» եռանկիւնու փոխգործակցութեան եւ փոխազդեցութեան շղթան: Նոյնականացուել են Եւրոպայի հայկական սփիւռքի լոպպիստական կառոյցները եւ նրանց գործունէութեան հիմնական ուղղութիւններն ու գործիքակազմերը, բացայայտուել է ղարաբաղեան հիմնախնդրի շուրջ ԵՄ քաղաքական վարքը:
Աշխատութեան մէջ վերլուծուել են էթնիկ լոպպինկի ներեւրոպական ընկալումը, լոպպինկի եւ դրա տարատեսակ էթնիկ լոպպինկի ինստիտուցիոնալ եւ օրէնսդրական հնարաւորութիւնները ԵՄ-ում:
Մենագրութիւնը նախատեսուած է քաղաքագէտների, պատմաբանների, հայագէտների, կառավարող ընտրանու, ՀՀ բարձրագոյն ուսումնական հաստատութիւնների դասախօսների եւ ուսանողների, ինչպէս նաեւ ընթերցասէր լայն հանրութեան համար:
Comments are closed.