Թուրքիոյ պատմագիտական ընկերութիւնը հակահայ վաւերագրական ժապաւէն մը պատրաստած է

Թուրքիոյ Պատմագիտական ընկերութիւնը «հայկական հարց»ի մասին նկարահանած է «փաստագրական» ժապաւէն մը, որ կը կոչուի «Հայերու ապստամբութիւնը, ահաբեկչութիւնն ու քարոզչութիւնը՝ Օսմանեան պետութեան դէմ»: Ժապաւէնի նպատակն է «հայկական հարց»ի մասին իրազեկել թրքական ու միջազգային հանրութիւնը:

Թուրքիոյ Պատմագիտական Ընկերութեան (Turkish Historical Society – Türk Tarih Kurumu) պաշտօնական կայքէջի վրայ կը նշուի որ ժապաւէնը եօթը մասերէ կը բաղկանայ: Վաւերագրական ժապաւէնը Հանրութեան պիտի ներկայացուի հինգ լեզուներով՝ թրքերէն, անգլերէն, սպաներէն, գերմաներէն եւ ֆրանսերէն:

Հարկ է նշել, որ Թուրքիոյ Պատմագիտական ընկերութիւնը անցեալին բազմաթիւ առիթներով, հրատարակութիւններու եւ գիտաժողովներու միջոցով հանրութեան ներկայացուցած է Հայոց Ցեղասպանութեան իրողութիւններու խեղաթիւրուած տարբերակը։

Ժապաւէնի տարբեր բաժիններու ենթախորագիրներն են.

1- 1915, ահաբեկչութիւն եւ ապստամբութիւն

2- 1915, տեղափոխութիւն եւ վերաբնակեցում

3- Սփիւռք, դիւանագիտութիւն եւ քարոզչութիւն

4- ASALA. արիւն ու կրակ

5- Կեղծ փաստաթուղթեր ու իրականութիւն

6- Ոչ-պատմական դիւանագիտութիւն

7- Առաջին կրակը. 1915 թուական, մահմետականներու դէմ դաժանութիւն: