Եկեղեցին, չունենալով քաղաքական իշխանութեան յաւակնութիւններ, պիտի շարունակի պատմական պատասխանատուութեան գիտակցութեամբ ջանքեր ներդնել յանուն հայրենիքի եւ պետականութեան զօրացման. Գերագոյն հոգեւոր խորհուրդ
Տաւուշի մարզից տարածքները Ատրպէյճանին միակողմանիօրէն յանձնելու իրողութեան եւ բանակցութիւններում ՀՀ իշխանութիւնների որդեգրած անընդունելի դիրքորոշումների առնչութեամբ Մայր Աթոռ Սուրբ Էջմիածինը վերահաստատում է նախընթաց արտայայտուած իր դիրքորոշումը։
Ասուած է Գերագոյն Հոգեւոր խորհրդի յայտարարութեան մէջ․
«Խիստ վտանգաւոր ենք համարում առանց համապարփակ ու երաշխաւորուած լուծումների Տաւուշի սահմանամերձ շրջանում սահմանազատման ու սահմանագծման անուան ներքոյ իրականացուող գործողութիւնները, որոնք նոր սպառնալիքներ են առաջացնում մեր ժողովրդի համար։ Ստեղծուած կացութիւնն արդարացի ընդվզում է առաջ բերել աշխարհասփիւռ հայութեան եւ, մասնաւորապէս, Տաւուշի սահմանամերձ համայնքների բնակիչների շրջանում՝ պատճառ դառնալով «Տաւուշը յանուն հայրենիքի» քաղաքացիական շարժման սկզբնաւորման:
Առկայ գոյաբանական մարտահրաւէրներին յանդիման հոգեւոր սպասաւորները, տուեալ դէպքում` Տաւուշի թեմի եկեղեցականները` թեմակալ առաջնորդի գլխաւորութեամբ, հաւատարիմ իրենց հոգեւոր առաքելութեանն ու կոչմանը, չեն կարող անտարբեր մնալ ու անհաղորդ՝ իրենց խնամքին յանձնուած ժողովրդի անհանգստութիւններին ու կարիքներին:
Մեր ժողովրդի զաւակներին յորդորում ենք արդար մտահոգութիւններն ու անհանգստութիւններն արտայայտել բացառաբար խաղաղ ճանապարհներով եւ դրսեւորել հանդարտութիւն ու զսպուածութիւն՝ զերծ մնալով հակաօրինական գործողութիւններից: Հասարակական կարգի պահպանութեան համար պատասխանատու ծառայութիւններից ակնկալում ենք բացառապէս օրէնսդրութեանը խիստ համապատասխան գործելաոճ։
Կոչ ենք անում նաեւ իշխանութիւններին` անսալ ժողովրդի հիմնաւոր պահանջներին եւ խաղաղութեանն ուղղուած գործընթացներում առաջնորդուել այնպիսի մօտեցումներով, որոնք չեն մեծացնի անվտանգային սպառնալիքները՝ խորացնելով մեր հանրութեան մէջ անպաշտպանուածութեան եւ անորոշութեան զգացումները: Կարեւորելով սահմանազատման ու սահմանագծման գործընթացները՝ միաժամանակ հաստատում ենք, որ այդ աշխատանքները պէտք է իրականացուեն պատերազմի բացառման, Հայաստանից բռնազաւթուած տարածքների վերադարձման եւ բնակավայրերի անվտանգ ու անխաթար կեանքի ապահովման երաշխիքների առկայութեան պայմաններում։
Ազգային մեր արժանապատուութիւնը, հայրենի պետութեան եւ սրբազան արժէքների հանդէպ նախանձախնդրութիւնն ու հաւատարմութիւնը պէտք չէ տեղի տան անյուսութեան, անհանդուրժողութեան եւ երկչոտութեան, թշնամանքի եւ ատելութեան առջեւ։
Եկեղեցին, չունենալով քաղաքական իշխանութեան յաւակնութիւններ, պիտի շարունակի պատմական պատասխանատուութեան գիտակցութեամբ ջանքեր ներդնել յանուն հայրենիքի եւ պետականութեան զօրացման, մեր ժողովրդի ինքնութեան ու իրաւունքների պաշտպանութեան, ազգային կեանքում միասնականութեան ու եղբայրասիրութեան ամրապնդման՝ նպաստելով տարածաշրջանում խաղաղութեան հաստատմանն ու ամրապնդմանը»:
Comments are closed.