Դաշնակցական Երիտասարդներու Տպաւորութիւնները` ՀՅԴ 12-րդ Համահայկական Բանակումին Մասին. Պիտի Վերադառնա՛նք

Աւելի քան 11 տարիէ անդամ ըլլալով ՀՅԴ Ֆրանսայի «Նոր սերունդ»-ին, ինչպէս նաեւ` վերջին 6 տարիներուն Կեդրոնական վարչութեան, յաճախ առիթը ունեցած եմ մասնակցելու երիտասարդական-ուսանողական տարբեր խորհրդաժողովներու: Տարբեր առիթներով լսած եմ մեր աւագ ընկերներու յուշեր եւ անմոռանալի յիշատակները համահայկական բանակումներուն մասին, որոնց պատճառով իմ ալ փափաքս դարձաւ օրին մէկը մասնակցիլ համահայկական բանակումի մը:

14 տարուան բացակայութենէ ետք, ՀՅԴ Բիւրոյի Երիտասարդական գրասենեակը կազմակերպեց ՀՅԴ Համահայկական բանակում մը, որ տեղի ունեցաւ 15-23 յուլիս 2025-ին, Հայաստանի Հանքաւան գիւղին մէջ:

ՀՅԴ «Նոր սերունդ» միութիւնը այս բանակումին ներկայացաւ իր 12 ընկերներով, որոնք հիացած եւ ուրախ էին, բազմաթիւ նոր բարեկամներ ունեցան եւ վերադարձան Ֆրանսա` նոր գիտելիքներով ու նոր եռանդով, անհամբեր սպասելով յաջորդ առիթին, որպէսզի դարձեալ միանան իրենց մեծ ընտանիքի ընկերներուն եւ ծանօթանան նորերու:

Բայց կ՛ուզեմ անպայման յիշել իմ երկու թանկարժէք ընկերներս, որոնք չկարողացան մասնակցիլ սոյն բանակումին` Նժդեհ Գարագաւորեանն եւ Սիւնէ Աբրահամեանը, որոնց Հայաստան մուտքը արգիլուած է Հայաստանի ներկայ ազգադաւ իշխանութեան կողմէ:

Ինչպէս կը նշէ մեր բանակումին կարգախօսը` «Պիտի՛ վերադառնանք»: Վստահ եմ, որ ես ու իմ ընկերներս մասնակից կ՛ըլլանք յաջորդ բանակումին Արցախ` Շուշիի լեռներուն:

Մինչ յաջորդ հանդիպումը, մնա՛նք, սիրելի երիտասարդներ, հաւատարիմ մեր գաղափարներուն:

Պիտի վերադառնանք, մահ կամ ազատութիւն:

ՅՈՎԻԿ ՎԱՀՐԱՄԻ
ՀՅԴ «Նոր սերունդ»-ի
Կեդրոնական վարչութեան անդամ