Դադիվանքը Եւ «Փաստի Յօրինումը». «Գեղարդ» Հիմնարկ

«Գեղարդ» գիտական վերլուծական կեդրոնը Դադիվանքի մասին Ազրպէյճանի տարածած ապատեղեկատուութեան վերաբերեալ հրապարակեց յօդուած մը, որուն մէջ կ՛ըսուի հետեւեալը.

«Քարոզչական դաշտին մէջ հայկական մշակութային եւ կրօնական ժառանգութեան բռնաիւրացումը Ազրպէյճանի կողմէ կ՛իրականացուի քանի մը կեղծ թեզերէ բաղկացած «մեթոտական ձեռնարկով»:

«Եթէ կայ հայկական եւ հայատառ որեւէ գրութիւն, ապա, ըստ ազրպէյճանցիներուն, անոնք կատարուած են նոր շրջանի մէջ: Կախուած ժամանակի քաղաքական իրավիճակէն` այդ «աւելացումները» կատարուած են 19-րդ դարուն, իսկ Արցախի մէջ, ինչպէս իրենք կը նշեն` գրաւման տարիներուն»: Այս հնարքը օգտագործուած է, օրինակ, Ամբերդի պարագային: Ըստ ազրպէյճանցի հետազօտողին, Վահրամաշէն եկեղեցւոյ պատերուն հայերէն գրութիւնները աւելցած են 20-րդ դարու սկիզբը: Ազրպէյճանի գիտութիւններու ակադեմիայի «գիտնականներու» կեղծ պնդումներով, հայերը «ալպանական եկեղեցիներու դէմ նիւթական եւ հոգեւոր յանցագործութիւնները» սկսած են 1836 թուականէն, երբ «աղուանական եկեղեցին դարձած է թեմ ու ենթարկուած` Էջմիածինի եկեղեցւոյ»:

««Հայերէն գրութիւններ աւելցնելու» կեղծ թեզը պարբերաբար կիրարկուած է Դադիվանք վանական համալիրի նկատմամբ, որ ազրպէյճանական վերահսկողութեան տակ անցած է 2020 թուականի նոյեմբերի վերջը:

«Օրերս ազրպէյճանական լրատուամիջոցներէն մէկը կարճ յօդուած մը հրապարակած է` «Ազրպէյճանական մեծ վանք Խուդավենգը ենթարկուած է հայկական կեղծարարութիւններու» վերնագրով: Ըստ այդ հրապարակման, 1993-2020 թուականներուն հայերը փորձած են կեղծել վանքին պատմութիւնը` զայն ներկայացնելով հայկական: Օրինակ` փոխարինուած են համալիրի խորհրդանիշները, տեղադրուած են այլ խաչեր, պատերուն վրայ աւելցուած են հին հայերէն գրութիւններ, իսկ ուտի-աղուաններու հին գերեզմանները իբր թէ աւերուած են»: