Արցախի հանդէպ մեր քաղաքական իրաւունքը ոչ ոք չի կարող տնօրինել, նոյնիսկ՝ ՀՀ ներկայ իշխանութիւնը. Արթուր Մոսիեան
![](https://horizonweekly.ca/wp-content/uploads/2024/09/Arthur-Mosiyan.jpg)
«Արցախի պաշտօնեաներն իրենց իրաւունքը չեն զիջի, այդ թւում՝ Ալէն Սիմոնեանին, քանի դեռ կայ բռնազաւթուած Արցախ, Ատրպէյճանում պահուող գերիներ, արցախահայութեան չլուծուած իրաւունքներ։ Որքան էլ սոցիալական առումով Արցախի պաշտօնեաների գործունէութեան իրաւունքները սահմանափակուեն, Արցախի հանդէպ մեր քաղաքական իրաւունքը ոչ ոք չի կարող տնօրինել, նոյնիսկ՝ ՀՀ ներկայ իշխանութիւնը։ Արցախի ժողովրդի մանդատը ստանձնած քաղաքական ղեկավարութիւնը շարունակելու է իր պայքարը արցախցիների վերադարձի իրաւունքի իրացման ուղղութեամբ։ Ո՞վ պէտք է պայքարի Արցախի ժողովրդի իրաւունքների համար, եթէ ոչ՝ Արցախի ժողովրդի կողմից ընտրուած օրինական մարմինները»։
«Ապառաժ»ի հետ զրոյցում, ՀՀ ԱԺ նախագահ Ալէն Սիմոնեանի երէկուայ ԱԺ յայտարարութիւններին անդրադառնալով, նշեց Արցախի Ազգային ժողովի պատգամաւոր, «Դաշնակցութիւն» խմբակցութեան ղեկավար Արթուր Մոսիեանը։
«Տպաւորութիւն է՝ ՀՀ իշխանութիւններն Ատրպէյճանից աւելի շատ են շահագրգռուած Արցախի էջը փակելու համար։ Նողկալի է դիտել՝ Ալիեւին բարեխօսելու համար ինչպէս են քամահրանքով խօսում Արցախի իշխանութիւնների, պետական ինստիտուտների մասին երկրի թիւ մէկ ամպիոնից, երբ Հայաստանը պէտք է հանդիսանար Արցախի երաշխաւորը եւ Արցախի իշխանութիւնների հետ միջազգային հարթակներում պայքարէր նրա իրաւունքների վերահաստատման համար։
Արցախը եղել եւ մնում է մեր Ազգային արժանապատուութիւնը, եւ անթոյլատրելի է, որ ինչ-որ «խմբակ» վարկաբեկի այն։
Սա առաջին անգամը չէ, որ ՀՀ իշխանութիւններն աւելի ատրպէյճանամէտ կեցուածք են դրսեւորում, քան ատրպէյճանական իշխանութիւնները։ Տպաւորութիւն է, որ իշխող քաղաքական խմբակն ունի պարտաւորութիւններ ատրպէյճանական ղեկավարութեան առաջ եւ առիթը բաց չի թողնում նրանց հաճոյանալու համար՝ կրկին անգամ արցախցիների բաց վէրքին աղ լցնելով», նշեց Արթուր Մոսիեանը։
Comments are closed.