Արցախը եղել եւ մնում է մեր լինելիութեան ու ամբողջական Հայաստանի կերտման գրաւականը. ՀՅԴ Բիւրոյի Յայտարարութիւնը

1991 թ. սեպտեմբերի 2-ին Արցախը միջազգային եւ ներպետական իրաւական կառուցակարգերին համապատասխան հռչակեց իր անկախութիւնը: 1988-ին սկզբնաւորուած ազգային շարժումը թեւակոխեց նոր հանգրուան: Հայ ժողովրդի միացեալ ջանքերով, արեամբ եւ զոհողութիւններով կերտուեց արցախեան յաղթական ազատամարտը: Արցախի ժողովուրդը վճռեց անդառնալիօրէն թօթափել ազրպէյճանական լուծը, ջնջել ստալինեան պարտադրուած արհեստական սահմանները ու յայտարարել, որ անկախութեան ճամփով Արցախը վերամիաւորուելու է Մայր Հայաստանի հետ:

2020 թ. սեպտեմբերին հրահրուած 44-օրեայ պատրերազմը ծանր հարուած էր հայութեանը. մեր նորագոյն պատմութեան ճակատագրական եւ բախտորոշ շրջափուլում ենք այսօր: Ազգովին կանգնած ենք ներքին ու արտաքին լրջագոյն մարտահրաւէրների առջեւ: Թէ՛ Հայաստանում, թէ՛ Արցախում վտանգուած է մեր պետական ինքնիշխանութիւնը, խոցուած է մեր ազգային արժանապատուութիւնը:

Սակայն, Դաշնակցութիւնը համոզուած է, որ Արցախին բաժին ընկած այս վերջին պատուհասը ժամանակաւոր պարտութիւն է. արցախահայութիւնը, եւ հայ ժողովուրդը առհասարակ, ունեն բաւարար կամք եւ ներուժ աշխատելու, որ վերականգնուի Արցախը եւ իրականանայ Հայաստանի հետ միաւորուելու նրա վերջնական տեսլականը:

Անկախութեան հռչակումից 30 տարի անց, առաւել քան երբեւէ, Արցախը մեր բոլորի աջակցութեան եւ զօրակցութեան կարիքն ունի: ՀՅ Դաշնակցութեան մարմինները, Հայ դատի գրասենեակներն ու յանձնախմբերը, իրենց յանձնառութեանը հաւատարիմ, ողջ կարողականութեամբ հետամուտ են լինելու Արցախի Հանրապետութեան ինքնուրոյնութեան կարգավիճակի ամրագրման, տարածքային ամբողջականութեան վերականգնման, անվտանգային միջավայրի ապահովման եւ ընկերատնտեսական զարգացման հարցերին:

Ուրախութեամբ յայտարարում ենք նաեւ, որ այսօր, Ստեփանակերտում, բացւում է ՀՅԴ Հայ դատի Արցախի գրասենեակը, որը միանում է Բիւրոյի անմիջական վերահսկողութեան ներքոյ գործող կենտրոնական գրասենեակների ցանցին:

Արցախը եղել եւ մնում է մեր ինքնութեան, միասնութեան եւ ազգային վերելքի խորհրդանիշն ու մեր լինելիութեան ու ամբողջական Հայաստանի կերտման գրաւականը:

Շնորհաւորում ենք Արցախի ժողովրդին իր անկախութէան 30-ամեակի առթիւ եւ հաստատում ենք, որ շարունակելու ենք մեր պայքարը թէ՛ ներքին, թէ՛ արտաքին ճակատներում` ի շահ Արցախի ինքնորոշման, ուժեղ պետականութեան վերահաստատման ու ազատութեան:

ՀՅԴ Բիւրօ