ԱԱԾ-ն հրաժարւում է տրամադրել որեւէ տեղեկատուութիւն, որը կը վկայի Մուրատ Փափազեանի «հակապետական» կամ «ահաբեկչական» մտադրութիւնների մասին

Գործող իշխանութիւնը իրականացնում է հայապաշտպան գործունէութեամբ զբաղուող անձանց Հայաստան մուտքի զանգուածաբար արգելքով։ Այս մասին լրագրողների հետ ճեպազրոյցում նշեց Մուրատ Փափազեանի ներկայացուցիչ Արծուիկ Մինասեանը։ Նշենք, որ Փափազեանի մուտքը Հայաստան արգելուել է, ինչից յետոյ Փափազեանը դատի է տուել ՀՀ Ազգային անվտանգութեան ծառայութեանը։

«Այս մարդիկ դէմ են ՀՀ իշխանութիւններին՝ Նիկոլ Փաշինեանի գլխաւորութեամբ ու այնքան յստակ է այստեղ քաղաքական դրդապատճառը, որ այլ բան մտածելու տեղ չի էլ թողնում», ասաց Մինասեանն ու շեշտեց. «Հիմա, որպէսզի իշխանութիւնը իր դէմքը փրկի, էն որ «ժողովրդավարութիւն» է ամբողջ օրը խօսում, գոռգոռում Եւրոպայում եւ աշխարհով մէկ, էստեղ պէտք է պարտուի, հակառակ դէպքում հաստատուելու է նրա բռնապետական հերթական փորձը»։

Comments are closed.