Ստեփանակերտում կը կայանայ Արցախի բարեկամների համաժողով
Ստեփանակերտում կը կայանայ Արցախի բարեկամների համաժողով
Հոկտեմբերի 11-ին Ստեփանակերտում կը կայանայ «Համագործակցութիւն յանուն արդարութեան եւ խաղաղութեան» խորագրով Արցախի բարեկամների համաժողով, որի նպատակն է ընդլայնել եւ ամրապնդել Արցախի Հանրապետութեան ապակենտրոնացուած համագործակցութիւնն օտարերկրեայ պետութիւնների տարբեր շրջանների եւ քաղաքների հետ, նոր ազդակ եւ գործնական բնոյթ հաղորդել Արցախի արդէն առկայ միջազգային կապերին, ինչպէս նաեւ ստեղծել Արցախին աջակցող սուբյեկտներին, քաղաքական եւ հասարակական գործիչներին միաւորող ցանց։
Համաժողովին մասնակցելու են տարբեր երկրներում գործող Արցախի հետ խորհրդարանական բարեկամութեան խմբերի եւ շրջանակների, ինչպէս նաեւ քաղաքական եւ հասարակական կառոյցների ներկայացուցիչներ, պատուիրակութիւններ Արցախի անկախութիւնը ճանաչած կամ Արցախի հետ համագործակցող վարչատարածքային միաւորներից. ընդհանուր՝ շուրջ 30 երկրներից աւելի քան 150 քաղաքական-հասարակական գործիչներ եւ մտաւորականներ։
Համաժողովին ուղերձով հանդէս կը գայ Արցախի Հանրապետութեան Նախագահ Բակօ Սահակեանը։ Ելոյթներ կ’ունենան ԱՀ Ազգային ժողովի նախագահը, Պետական նախարարը, Արտաքին գործերի, Կրթութեան, գիտութեան եւ սպորտի, Մշակույթի, երիտասարդութեան հարցերի եւ զբօսաշրջութեան նախարարները, ՀՅԴ Բիւրոյի ներկայացուցիչը, Հայ Դատի Ուաշիկթընի եւ Պրուքսէլի գրասենեակների ներկայացուցիչները։
Համաժողովի քննարկումները կ’անցկացուեն երկու թեմաների շուրջ.
ա) «Արցախի ժողովրդի ինքնորոշման իրաւունքը եւ խաղաղ կարգաւորման գործընթացը».
բ) «Արցախի Հանրապետութեան միջազգային կապերի ընդլայնման հնարաւորութիւնները տնտեսական, մշակութային եւ գիտակրթական ոլորտներում՝ Արցախի մեկուսացմանն ուղղուած Ատրպէյճանի քաղաքականութեանը դիմագրաւելու նպատակով»։
Համաժողովը կ’ընդունի հռչակագիր։
Համաժողովի համակազմակերպիչներն են Արցախի Հանրապետութեան Արտաքին գործերի նախարարութիւնն ու Հայ Յեղափոխական Դաշնակցութիւնը։
Արցախի Հանրապետութեան
Արտաքին գործերի նախարարութեան
Տեղեկատուութեան եւ հասարակայնութեան հետ կապերի վարչութիւն
Հայ Յեղափոխական Դաշնակցութեան
Հանրային կապերի գրասենեակ