«Մենք Քոչարեանին Չենք Աջակցած Եւ Չենք Ալ Պատրաստուիր Աջակցիլ» Կ՛ըսէ Արմէն Ռուստամեան
Հայաստանի Ազգային ժողովի ՀՅԴ խմբակցութեան ղեկավար Արմէն Ռուստամեան լրագրողներուն հետ ունեցած զրոյցին ընթացքին յայտնած է, թէ Դաշնակցութիւնը վստահ է, որ Երեւանի քաղաքապետի իր թեկնածուն` Միքայէլ Մանուկեանը լաւատեղեակ է քաղաքի խնդիրներուն եւ ընտրուելու պարագային պիտի վարէ մարդուժի -անձնակազմի ճիշդ քաղաքականութիւն:
«Միքայէլ Մանուկեանը` իբրեւ հմուտ ղեկավար, լաւագոյնս դրսեւորած է ինքզինք: Մեր խորին համոզումով, քաղաքը հմուտ ղեկավարման կարիք ունի: Ան կը տիրապետէ Երեւանի վիճակին: Քաղաքապետը նախ եւ առաջ պէտք է քաղաքը իր տասը մատներուն նման ճանչնայ, գիտնայ, թէ ո՛ւր ի՛նչ խնդիրներ կան: Ան նաեւ պէտք է գտնէ լաւագոյն մարդուժն ու անձնակազմը, որոնք այդ գործին գիտակներն են», դիտել տուած է Ռուստամեան:
Արմէն Ռուստամեանին համաձայն, որեւէ իշխանութեան կարեւորագոյն ցուցանիշը մարդուժի եւ անձնակազմի ընտրութեան քաղաքականութիւնն է: Քաղաքապետը պէտք է փնտռէ ու գտնէ լաւագոյն անձերը, որոնք պիտի լուծեն քաղաքի բոլոր խնդիրները: «Ես կասկած չունիմ, որ Միքայէլ Մանուկեանը այդ մէկը կ՛ընէ», ըսած է Ռուստամեան եւ աւելցուցած, որ հին անձնակազմը պէտք չէ աշխատանքէ արձակուի, այլ պէտք է պահել անոնք, որոնք լաւապէս աշխատած են:
Անդրադառնալով այն հարցին, թէ Դաշնակցութիւնը ինչո՞ւ անվերապահ կերպով կը սատարէ երկրորդ նախագահ Ռոպերթ Քոչարեանին` Արմէն Ռուստամեան ըսած է, որ կուսակցութիւնը չէ աջակցած եւ չի ալ պատրաստուիր աջակցիլ անոր:
«Ընդհանրապէս, ժողովուրդը պէտք չէ կուռքեր ստեղծէ: Դժբախտաբար, ես 88 թուականէն այդ վիճակը տեսած եմ, նորէն նոյն սխալը չկրկնենք: Կուռքեր չկան, ոչ ոքի խորհուրդ կու տամ անվերապահօրէն մէկու մը աջակցելու: Մեր անվերապահ պաշտպանութիւնը արժեհամակարգին կը վերաբերի միա՛յն», ըսած է ան:
Պատգամաւորը շեշտած է, որ իրենք կ՛ըսեն` մի՛ դատեր, որ չդատուիս, բայց եթէ կը դատես, ուրեմն ատիկա պէտք է ընես առանց ցասումի եւ կողմնակալութեան: «Այս է հանրայայտ ճշմարտութիւնը, եթէ անգամ մը մենք մեր կիրքերով, զգացումներով եւ անաչառ չըլլալով դատեցինք, վաղը ատիկա պիտի դառնայ սկզբունք եւ յետոյ ատոր դէմ պէտք է պայքարինք: Կարելի չէ անարդարութեան դէմ պայքարիլ ոչ արդար միջոցներով. այս է մեր ըսածը` ըլլա՛յ Ռոպերթ Քոչարեանի, թէ ոեւէ ուրիշի պարագային», յայտնած է Ռուստամեան:
Ան նաեւ նկատել տուած է, որ մեղադրուողը եւս իր իրաւունքները ունի: «Մենք այդ մակարդակին հասած ազգ ենք, մենք քարէ դարուն չենք ապրիր, որ զգացումներով դատենք: Եթէ դատարանը մեղաւոր նկատէ, թող ամէնէն խիստ պատիժը տրուի, վերջանայ հարցը, բայց պէտք չէ դատարանէն առաջ անցնիլ: Այդպէս կարելի է ոեւէ մէկը դատել, եւ մենք այդպիսով պիտի ունենանք հասարակութիւն, ուր բոլորը բոլորին դէմ լարուած են: Այդ մթնոլորտը ես, դժբախտաբար, կը տեսնեմ, եւ ատիկա զիս կը մտահոգէ», նշած է Արմէն Ռուստամեան:
Պատասխանելով այն հարցումին, որ Դաշնակցութիւնը պիտի համագործակցի՞ Քոչարեանին հետ` Ռուստամեան ըսած է, որ իրենք կը համագործակցին ոեւէ անձի հետ, որ կը կիսէ ՀՅԴ-ի մօտեցումներն ու նպատակները: «Այդպէս եթէ ըլլար, մենք ՀՀՇ-ին հետ ալ պէտք չէ համագործակցէինք, ՀԱԿ-ին հետ քառեակ պէտք չէ կազմէինք, երբ ուղղակի մեզի հետ հարց ունեցած են: Մենք Լեւոն Տէր Պետրոսեանը ընդունած ենք մեր գերագոյն մարմինին մէջ, եւ ինչ քարկոծում ըսես` եղած է նաեւ այդ ժամանակ: Բայց մենք նկատած ենք, որ ճիշդը այդ է, որովհետեւ մենք մեր երկրին մէջ թշնամիներ պէտք չէ ունենանք», նշած է ան:
Անդրադառնալով այն հարցին, թէ կը կիսէ՞ Քոչարեանի կողմնակիցներուն այն մտահոգութիւնները, թէ անոր նկատմամբ քաղաքական հետապնդում կը կատարուի` Ռուստամեան յայտնած է, որ քաղաքական բանտարկեալներուն առնչուած կան հինգ չափորոշիչներ, բայց անոնք չեն կիրարկուիր ոեւէ մէկուն նկատմամբ, որպէսզի կարելի ըլլայ ըսել, թէ ո՛վ քաղաքական բանտարկեալ է:
Ռուստամեանի համաձայն, ասիկա նկատի ունենալով, պէտք է սպասել ապացոյցներու ամբողջացման, որպէսզի անկէ ետք մեղադրանք առաջադրուի: «Մենք այսօր ունինք 10 զոհեր, եւ պէտք է գտնել մեղաւորները` անաչառօրէն կատարելով բոլոր բացայայտումները, իր ամբողջութեան մէջ: Իսկ երբ կ՛առաջադրուի մեղադրանք, որ դեռ պէտք է փաստուի, այդ պարագային ան կրնայ ատով արդարանալ», աւելցուցած է ան:
Արմէն Ռուստամեան խօսած է նաեւ վարչապետին` սահմանադրական փոփոխութիւններ կատարելու մտադրութեան մասին եւ դիտել տուած է, որ մենք պէտք է շարունակենք գործել այն հիման վրայ, որ Հայաստանի մէջ օրէնսդրական կարգաւորումները, Սահմանադրութիւնը անշրջանցելի են: Ըստ անոր, Հայաստան միջազգային տարբեր կառոյցներու հետ ձեւաւորած է օրէնսդրական դաշտը, զոր կարելի չէ մէկ օրէն ոչնչացնել: «Մենք չենք պատրաստուիր հակասահմանադրական որեւէ քայլի մասնակից դառնալ», յայտարարած է ան:
Պատգամաւորը ըսած է, թէ վարչապետին կողմէ հրապարակը հնչած բոլոր գաղափարները քննարկման կարգ ու ձեւ ունին: «Բայց դատարաններ կան, պետական մարմիններ կան, ճիշդ ուղի չէ մէկ օրուան մէջ այնպէս համարել, որ անոնք գոյութիւն չունին: Չեմ կարծեր, թէ վարչապետը ատիկա նկատի ունի, քանի որ Ազգային ժողովի նախագահին հետ հանդիպումէն ետք լաւատեսութիւնը, այդ առումով, աւելցած է: Մենք ալ պատրաստ ենք բոլոր քննարկումներուն մասնակցելու, մեր լուման ներդրելու, հասկնանք ի՛նչ կ՛ուզենք ընել եւ ինչի՛ համար», նշած է ան:
Ռուստամեան շեշտած է, որ արտակարգ խորհրդարանական ընտրութիւնները այսօր մէկ ուղի ունին` այդ ալ երկու անգամ վարչապետ չընտրելն է: Ան ըսած է, թէ չի կարծեր տեղին է վարչապետին այն մտավախութիւնը, որ խորհրդարանը կրնայ գաղտնի կերպով վարչապետ ընտրել: «Եթէ ան դաւադրութիւններ կը տեսնէ, եւ վարչապետին խօսքերէն ատիկա նկատելի է, ես, ճիշդը ըսեմ, նման բանի հիմքեր չեմ տեսներ: Ցարդ չէ եղած նման պարագայ, որ բանի մը պայմանաւորուինք եւ չկատարենք: Ազգային ժողովը իր ներկայ կարգավիճակով որեւէ ձեւով չի խոչընդոտեր գործադիրին աշխատանքները, այն օրէնքները, որոնք անհրաժեշտ են, կ՛ընդունուին, նոյնիսկ անձեռնմխելիութենէն զրկել իր գործընկերը: Չեմ պատկերացներ, թէ այդ կասկածը ինչէ՞ն կը յառաջանայ, եթէ կայ նման կասկած, ճիշդ պիտի ըլլայ այդ մասին խօսիլ, որպէսզի հասկնանք` իրակա՞ն է, թէ՞ ոչ», ըսած է ան:
Արմէն Ռուստամեան դիտել տուած է, որ եթէ այդ կասկածը փարատելու համար այդ ուղին կ՛ընտրուի, նորէն պէտք է Ազգային ժողովին միջոցով կատարուի: «Ատոր համար 70 ձայնի կարիք կայ, այդ ալ նոյն Ազգային ժողովը պիտի ընէ, չէ՞: Եթէ նախապէս կայ այն տպաւորութիւնը, որ այստեղ ինչ-որ դաւադրութիւններ կան, 70 ձայնի պարագային այդ դաւադրութիւնը չի՞ գործեր», նշած է ան:
Եթէ ժողովուրդը կ՛որոշէ, որ Սահմանադրութիւնը պէտք է փոխուի, Ռուստամեանի համաձայն, ամբողջ աշխարհը ժողովուրդին իշխանութիւնը կը հասկնայ մէկ ձեւով` հանրաքուէ, ոչ թէ հրապարակ: Ան դիտել տուած է, որ հրապարակի որոշումը կարելի չէ նկատել ամբողջ ժողովուրդինը` աւելցնելով, որ իրենք դէմ չեն հանրաքուէին, սակայն այդ պարագային բոլոր հարցերը պէտք է դրուին հանրաքուէի եւ ոչ միայն ասիկա: