«Հորիզոն»ի լսատեսողական տաղաւարով օժտուիլը մեզի համար յաւելում մըն է եւ հարստացում. հարցազրոյց «Հորիզոն»ի աւագ խմբագիր Վրէժ Արմէնի հետ

«Հորիզոն»ի աւագ աշխատակից Սոնա Թիթիզեան հարցազրոյց ունեցաւ «Հորիզոն»ի աւագ խմբագիր Վրէժ Արմէնի հետ, որուն ընթացքին ան յայտնեց. «”Հորիզոն”ի լսատեսողական տաղաւարով օժտուիլը մեզի համար յաւելում մըն է եւ հարստացում, բայց պէտք չէ փոխարինէ տպագիր կամ առցանց տարբերակով հրատարակուող թերթը: Ընթերցելը տարբեր ազդեցութիւն կը ներգործէ ընթերցողին վրայ, իսկ տեսանիւթը՝ այլ: Երկուքն ալ կարեւոր են: Տեսանիւթը կրնայ շատ հետաքրքրական ըլլալ, նոր կարելիութիւններ կրնայ ստեղծել, զանազան հարցեր ներկայացնելու տեսակէտէն, բայց մանաւանդ լուրջ յօդուածներու պարագային՝ հարկ է պահել նաեւ ընթերցելի թերթը»:

Ան նաեւ իր մաղթանքը յայտնեց ըսելով. «”Հորիզոն”ը կը թեւակոխէ իր 46-րդ ամեակը. մաղթանքս է, որ կարենանք 46 տարի եւս շարունակել մեր գոյութիւնը եւ կարենանք երիտասարդներ ներգրաւել մեր շուրջը, որպէսզի թէ՛ զիրենք քաջալերենք եւ թէ՛ մենք կարենանք մեր յաջորդները ապահովել»:
Նշենք, որ Վրէժ Արմէն 1979-ին հիմնադրութեան օրէն ի վեր կապուած է «Հորիզոն» շաբաթաթերթին, 11 տարի վարած է խմբագիրի, իսկ 1992-էն ի վեր՝ աւագ խմբագիրի պաշտօնը, միաժամանակ ստանձնած է գրական յաւելուածի խմբագրութիւնը եւ առ այսօր մաս կը կազմէ «Հորիզոն-Գրական»ի խմբագրակազմին: Վրէժ Արմէն տարիներէ ի վեր առանց ընդմիջումի ունի իր յատուկ սիւնակը «Հորիզոն»ի մէջ իր ոստայններով, ընկերային զրոյցներով, տեսադաշտերով, յուշերով եւ այլազան յօդուածներով:

Մանրամասնութիւնները տեսանիւթով։