«Հայաստան» դաշինքի յայտարարութիւնը . Մենք սկզբնաւորում ենք համազգային դիմադրութիւն՝ Հայաստանում, Արցախում, Սփիւռքում

«Հայաստան» դաշինքի՝ Ազատութեան հրապարակում նախաձեռնած հանրահաւաքի աւարտին ընդունուել է յայտարարութիւն․

Հիմք ընդունելով հայ ժողովրդի միասնական կամքն արտայայտող՝ Հայաստանի անկախութեան եւ ԼՂՀ հռչակման մասին հռչակագրերը, վերահաստատելով Հայաստանի եւ հայ ժողովրդի անքակտելի իրաւունքներն ու կենսական շահերը պաշտպանելու յանձնառութիւնը՝

Նկատի ունենալով, որ

· Այս իշխանութիւնն աղետաբեր է Հայաստանի, Արցախի ու հայութեան համար,

· Պարտութեան խորհրդանիշ ուժը չի կարող խաղաղութիւն, արժանապատուութիւն, զարգացում ապահովել,

· Իշխանութիւնը պահելու համար իշխող ուժը պատրաստ է գնալ նորանոր զիջումների եւ ինքնիշխանութեան կորստի,

Հաշուի առնելով

· Ադրբեջանի եւ Թուրքիայի սանձազերծած պատերազմի հետեւանքով տարածաշրջանային եւ աշխարհաքաղաքական լրջագոյն մարտահրաւէրները,

· Քաղաքական-տնտեսական էքսպանսիա իրականացնելով՝ տարածաշրջանում հաստատուելու՝ Թուրքիայի նկրտումները,

· 44-օրեայ պատերազմի արդիւնքներից առաւելագոյնը ստանալու՝ թուրք-ադրբեջանական տանդեմի նպատակը, այն է՝ Արցախի հայաթափումն ու Հայաստանի հանդէպ տարածքային յաւակնութիւններ բաւարարելը,

· Արցախեան հակամարտութեան էութեան եւ ձեւաչափի միջազգային ընկալումից, խաղաղ կարգաւորման գործընթացի հիմնարար սկզբունքներից Ադրբեջանի հրաժարումը,

· ՌԴ խաղաղապահ առաքելութիւնը սահմանափակելու եւ պատերազմ վերսկսելու՝ Ադրբեջանի փորձերը,

Արձանագրելով, որ

· Հայաստանում հաստատուել է մէկ մարդու իշխանութիւն, պետական ինստիտուտները կազմալուծուած են,

· Ուժային կառոյցները ծառայեցւում են իշխանութիւնը պահելու միակ նպատակին,

· Հայաստանն այլեւս իրաւական, ժողովրդավարական, սոցիալական պետութիւն չէ,

Համոզուած լինելով, որ

• Հայաստանի եւ հայութեան կողմից կենսական զիջումներ ենթադրող որեւէ գործընթացի վերջնականութիւնը հայոց պետականութեան փլուզումն է,

• Հայաստանի՝ որպէս ազգային եւ ինքնիշխան պետութեան զարգացման երաշխիքը նրա աշխարհաքաղաքական նշանակութեան եւ սերունդների իրաւունքների պահպանումն ու ամրապնդումն է,

• Հայաստանի եւ Արցախի գոյութեան ու անվտանգութեան հիմնահարցերը փոխկապակցուած են,

• Արցախեան հիմնախնդրի արդարացի լուծման, կայուն խաղաղութեան ապահովման երաշխիքը ժողովուրդների իրաւահաւասարութեան եւ ինքնորոշման իրաւունքի անվերապահ կիրառումն է՝ բացառելով Ադրբեջանի կազմում Արցախի՝ որեւէ կարգավիճակով ամրագրումը,

• Անհրաժեշտ է վերականգնել Արցախի ժողովրդի անվտանգութիւնն ու ինքնորոշման իրաւունքի իրացումը երաշխավորելու՝ Հայաստանի յանձնառութիւնը,

• Հայաստանի Հանրապետութիւնը պաշտօնապէս ներկայացնող որեւէ անձ, Սահմանադրութեամբ եւ օրէնքներով նախատեսուած ընթացակարգերի խախտումով, չի կարող ստորագրել քաղաքական կամ ռազմական բնոյթի որեւէ փաստաթուղթ։

Հանրահաւաքը յայտարարում է.

Արտաքին վտանգները չէզոքացնելու, Արցախի հայաթափումը, Հայաստանի թուրքացումը բացառելու, ներքին կեանքում համերաշխութիւն հաստատելու, հայութիւնը համախմբելու նպատակով մենք սկզբնաւորում ենք համազգային դիմադրութիւն՝ Հայաստանում, Արցախում, Սփիւռքում։

Նպատակն անփոփոխ է՝ հեռացնել պարտութեան խորհրդանիշ ուժին, վերականգնել Հայասատանի ինքնիշխանութիւնն ու հայ մարդու արժանապատուութիւնը։

Սա մէկ ուժի, մէկ դաշինքի դիմադրութիւն չէ, իւրաքանչիւրութիւն արժանապատիւ հայ մարդու գործն է։

Մինչև յաղթանակը՝ այս պայքարը կարող է մէկ շաբաթ կամ ամիսներ տևել։ Սա ենթադրում է իւրաքանչիւրիս հետևողական, ամենօրեայ աշխատանք եւ գործողութիւն։

Մենք սկսում ենք կազմակերպուել։ Մեր ներկայութիւնն Ազգային ժողովում ծառայելու է դիմադրութեան հզօրացմանը։ Պահը հասունացաւ՝ պայքարը կը տեղափոխենք միայն փողոցներ ու հրապարակներ։

Պարտութեան խրհրդանիշ վարչախումբը հեռացուելու է։ Սիւնիքը չի զիջուելու, Արցախը չի հայաթափելու, Հայաստանը չի թուրքացուելու։

Հայաստանը լինելու է ինքնիշխան պետութիւն, հայ մարդն ապրելու է արդար, ուժեղ երկրում։ Հայ մարդն աշխարհում քայլելու է գլուխը բարձր։