Համագործակցութեան Հռչակագիր «Հայաստան» Քաղաքական Դաշինք

Մեր Մասին

«Հայաստան» դաշինքը քաղաքական կուսակցութիւնների, կազմակերպութիւնների եւ անհատ գործիչների միաւորում է: Այն ձեւաւորուել է յանուն Հայաստանի Հանրապետութեան, Արցախի Հանրապետութեան, յանուն հայ ժողովրդի յարատեւ անվտանգութեան, զարգացման եւ բարեկեցութեան:

Դաշինքի ձեւաւորումը թելադրուած է 2020 թուականի 44-օրեայ պատերազմի աղէտալի հետեւանքները, մեր պետականութեանը նետուած նոր սպառնալիքները յաղթահարելու անհրաժեշտութեամբ:

Դաշինքն առաջնորդւում է գիտակցութեամբ, որ միայն համատեղ ջանքերով եւ միասնական լինելով է հնարաւոր լուծել երկրի առջեւ ծառացած լրջագոյն խնդիրները:

Մենք պատրաստ ենք ստանձնել ամբողջ պատասխանատուութիւնը պետութեան ճակատագրի հանդէպ, կանխել պետականութեան փլուզումը, ձեւաւորել նոր որակի իշխանութիւն, կերտել Հայաստանի ապագան:

Մենք համոզուած ենք, որ խորհրդարանական մեծամասնութեան միջոցով կը ձեւաւորենք այնպիսի գործադիր իշխանութիւն, որը վեր կանգնելով նեղ քաղաքական նպատակներից, կը ծառայի ազգային-պետական շահերին, կ’իրականացնի դրանց պաշտպանութեանն ուղղուած արտաքին քաղաքականութիւն, կ’երաշխաւորի յուսալի անվտանգութիւն, կը կասեցնի ընկերային-տնտեսական անկումը, կ’ապահովի զարգացման բարձր կշռոյթ, կը կանխի զանգուածային արտագաղթի նոր ալիքը` անհրաժեշտ հիմքեր ստեղծելով արժանապատիւ եւ երկարաժամկէտ խաղաղութեան համար:

Անցեալի Մասին

Մենք կարեւորում ենք երկրի զարգացման վերջին 30 տարիների պատմութեան հակասական փուլերի բաց եւ անկեղծ արձանագրումը, հաստատակամ ենք բացթողումներից խօսելու, անցեալից դասեր քաղելու, ապագայի նոր էջ բացելու հարցերում:

Ամենաբարդ ժամանակներում մեզ յաջողուել է պահպանել անկախ Հայաստանը` որպէս աշխարհի բոլոր հայերի ազգային պետութիւն, արձանագրել միասնական նպատակներ եւ յաջողութիւններ, քայլել աշխարհին համընթաց, տարածաշրջանում դառնալ գործուն դերակատար, աշխարհաքաղաքական բարդ իրավիճակներում հաւասարակշռութիւն պահպանել: Բոլոր իշխանութիւնների օրօք եղել են յաջողութիւններ «ՀԱՅԱՍՏԱՆ» ՔԱՂԱՔԱԿԱՆ ԴԱՇԻՆՔ Համագործակցութեան հռչակագիր եւ բացթողումներ, ձեռքբերումներ եւ սխալներ: Այնուամենայնիւ, մեր պետութիւնը շարունակել է իր ընթացքը` լինելով Հայաստան-Արցախ-սփիւռք եռամիասնութեան ամուր խարիսխ:

2018-ին երկրի ընթացքը խաթարուեց: Արմատական փոփոխութիւնների, արդար երկիր կառուցելու խոստմամբ իշխանութեան եկած քաղաքական ուժը, դրսեւորելով յանցաւոր անպատասխանատուութիւն եւ պետական կառավարման համակարգը կազմալուծելու, օտարածին օրակարգեր սպասարկելու, հասարակական–քաղաքական մթնոլորտը թունաւորելու իր հետեւողական քայլերով ո՛չ միայն չկատարեց հանրութեանը տուած խոստումները, այլեւ երկիրը ներքաշեց պատերազմի մէջ` զոհելով հազարաւոր երիտասարդների, կորցնելով Արցախի Հանրապետութեան մեծ մասը, թուլացնելով պետականութեան հիմքերը, վտանգելով մեր ընդհանուր ապագան:

Արցախ

Արցախի Հանրապետութեան հետ տեղի ունեցածը եւ շարունակուող գործընթացները ցաւոտ հարուած են մեր ազգային պետականութեանը, խաթարում են երկրի անվտանգութիւնն ու պաշտպանունակութիւնը, հարցականի տակ են դնում մեր արժանապատուութիւնն ու կեանքի իրաւունքը:

Անարդարացի սթաթիւս քոն կարող է նոր պատերազմի պատճառ դառնալ: Ուստի մենք կողմ ենք ԵԱՀԿ-ի Մինսքի խմբի համանախագահողների միջնորդութեամբ բանակցային գործընթացի վերսկսմանը` ուղղուած Արցախի տարածքի վերականգնմանը` ինքնորոշման իրաւունքի հիման վրայ, եւ Արցախ-Հայաստան երաշխաւորուած, գործուն ցամաքային անվտանգ կապի ապահովմանը:

Դաշինքը, մեր քաղաքացիների վստահութեան քուէն ստանալուն պէս, հետամուտ է լինելու թուրք-ազրպէյճանական նախայարձակման եւ պատերազմական յանցագործութիւնների միջազգային ճանաչմանն ու դատապարտմանը, լծուելու է յետպատերազմեան մարդասիրական աղէտի հետեւանքները մեղմելու աշխատանքներին (գերիների վերադարձ, զոհուածների եւ անհետ կորածների տուեալների ամբողջացում, վիրաւորների ու հաշմանդամների, տնաւեր դարձած մարդկանց ընկերային աջակցութիւն, վերականգնողական աշխատանքներ եւ այլ կարեւորագոյն հարցեր):

Մենք համոզուած ենք, որ պատերազմից կարելի էր խուսափել, եթէ անհեռատես եւ անպատասխանատու քայլերի հետեւանքով բանակցութիւնները չմտնէին փակուղի: Պատերազմը, դրան նախորդող ու յաջորդող գործընթացները պէտք է քննութեան առարկայ դառնան, ստանան քրէաիրաւական եւ քաղաքական ամբողջական գնահատական:

Մեր Յանձնառութիւնը

Մենք պարտաւոր ենք կասեցնել ազգակործան այս ընթացքը, դասեր քաղել անցեալից, Հայաստանն ազատել օտարածին օրակարգով շարժուող եւ թշնամու շահերը սպասարկող խմբակից, բոլոր ջանքերը գործադրել պետութեան եւ հասարակութեան կայուն, առողջ զարգացման համար, կառուցել մեր երկրի ապագան:

Մենք բացառում ենք.

• Մէկ անձի ձեռքում իշխանական լծակների կեդրոնացումը,
• Պետական իշխանութեան հաստատութիւնների կազմաքանդումը,
• Իշխանութեան ամբարտաւանութիւնը, ամենաթողութիւնը, ապազգային եւ ամբոխավարական գործելաոճը,
• Արդարադատութիւնը խոչընդոտելը,
• Հասարակութեան մէջ ներքին բաժանարար գծերի ստեղծումը, ներազգային պառակտումը,
• Ընկերային բեւեռացումը,
• Հանրային կարծիքի այլասերումը եւ կեղծ լուրերի հետեւողական շրջանառման դատապարտելի քաղաքականութեան շարունակումը:

Մենք երաշխաւորում ենք.

• Պետական համակարգի արդիւնաւէտ կառավարում,
• Անվտանգ երկիր, պաշտպանուած սահմաններ,
• Տնտեսութեան աշխուժացում, գիւղատնտեսութեան զարգացում, ներդրումների ներհոսք, կեանքի որակի տեսանելի բարելաւում, աղքատութեան ցուցանիշների շեշտակի նուազեցում,
• Բացառապէս օրինական ընտրութիւններով իշխանութեան ձեւաւորում,
• Փտածութիւնից, հովանաւորչութիւնից եւ չարաշահման որեւէ դրսեւորումից զերծ իշխանութեան գործունէութիւն,
• Պետական իշխանութեան ու պիզնեսի տարանջատում,
• Ընկերային արդարութեան եւ բարեկեցութեան անհրաժեշտ պայմանների ստեղծում. հանրային կեանքի որակի իրական եւ առաջանցիկ բարելաւում,
• Երիտասարդութեան աշխուժ ներգրաւում,
• Հասարակութեան մէջ նոր վարքականոնի հաստատում:

Ապագայի Մասին

Հայաստանի Հանրապետութիւնը ողջ հայութեան անկախ պետականութեան երազանքի մարմնաւորումն է: Խաթարուած ազգային արժանապատուութիւնը եւ դիմադրողականութիւնը, պետականութեան կորուստները վերականգնելու, ինքնիշխանութիւնը պահպանելու համար անհրաժեշտ է վճռական քայլերով լաւատեսութիւն եւ հաւատ ներշնչել երկրի ապագայի հանդէպ` յաղթահարելով անվտանգային, քաղաքական, ընկերային-տնտեսական եւ բարոյահոգեբանական ճգնաժամը:

Մենք կարոԲղ ենք եւ կերտելոԲւ ենք իր ուժերին վստահ, արժանապատիւ պետութիւն, որն ունակ է պաշտպանելու երկրի սահմաններն ու ժողովրդի անվտանգութիւնը:

ժամանակակից կրթութիւնը, գիտական, արհեստագիտական առաջընթացը եւ նորարարութիւնը Հայաստանի յուսալի ապագան կերտելու բանաձեւի կարեւորագոյն բաղադրիչներն են:

Հայ ինքնութեան պահպանման եւ զարգացման հիմնասիւներն են հայոց լեզուն, պատմութիւնը, հաւատքը, Հայ առաքելական սուրբ եկեղեցին, մշակոյթը, ուրոյն արժեհամակարգը:

Համաշխարհային գործընթացներում մեր մրցակցային առաւելութիւնն այն քաղաքացին է, որն իբրեւ ինքնութեան անկիւնաքարային բաղադրիչ գիտակցում է պետականութեան դերը, կարող է խելամտօրէն համադրել ազգայինն ու համամարդկայինը, աւանդականն ու ժամանակակիցը:

Ապագան Կերտելու Գրաւականը

•  Խաղաղութիւն եւ անվտանգութիւն,
• Արդարութիւն, ազատութիւն, համերաշխութիւն,
• Հայոց ցեղասպանութեան միջազգային ճանաչում եւ դատապարտում, հայ ժողովրդի անժամանցելի իրաւունքների իրացում,
• Համահայկական ներուժի ամբողջական իրացում, երկքաղաքացիութեան սահմանափակումների վերանայում,
• Ազգային միասնականութեան եւ անփոփոխ բարոյական արժէքների վրայ հիմնուած քաղաքական մշակոյթ:

Մենք ունենք երկրի զարգացման երկարաժամկէտ ծրագրեր, որոնք կը ներկայացուեն հանրութեանը եւ որոնց իրականացումը սկսուելու է «ՀԱՅԱՍՏԱՆ» դաշինքի յաղթանակով: Մեր ժողովուրդն զգալու է կեանքի որակի դրական փոփոխութիւնները ամենամօտ ապագայում:

Դաշինքի անդամ հանդիսացող իւրաքանչիւր ոք գիտակցում է պատմական այս փուլի պատասխանատուութիւնը եւ պատրաստակամ է աշխատել իր կարողութիւնների առաւելագոյն կեդրոնացմամբ` յանուն երկրի ապագայի, յանուն հայկական պետականութեան նոր վերելքի:

Ռոպերթ Քոչարեան
Հայաստանի Հանրապետութեան երկրորդ Նախագահ

Իշխան Սաղաթէլեան
Հայ Յեղափոխական Դաշնակցութեան ԳՄ ներկայացուցիչ

Վահէ Յակոբեան
«Վերածնուող Հայաստան» կուսակցութեան նախագահ