«Թշնամին երկու ուղղութիւններով կրակում է Հայաստանի ինքնիշխան տարածքի վրայ». Իշխան Սաղաթելեան
Այս իշխանութիւնը ձեռքերը լուացել է Արցախից, Արցախ չմեկնելը նաեւ յստակ վերաբերմունք էր Արցախի անկախութեանը: Տարօրինակ է, որ Արցախում էլ որեւէ լուրջ եւ էական միջոցառում կազմակերպուած չէր՝ անկախութեան տօնին նուիրուած։ Ըստ էութեան, սեպտեմբերի 2-ին գլխաւոր իրադարձութիւնը Դաշնակցութեան գրասենեակի բացումն էր Ստեփանակերտում, որին ներկայ էին Արցախի նախկին նախագահները, Արցախի ԱԳ նախարարը, որի ընթացքում նաեւ կարեւոր քաղաքական ուղերձներ հնչեցին: «Փաստինֆօ»-ի հետ զրոյցում ասաց ԱԺ փոխնախագահ, ՀՅԴ ԳՄ ներկայացուցիչ Իշխան Սաղաթելեանը:
Այսպիսով՝ սեպտեմբերի 2-ին Արցախը տօնում էր անկախութեան 30-ամեակը: Արցախի անկախութեան օրն առաջին անգամ նշուեց առանց որեւէ տօնակատարութեան, ՀՀ բարձրագոյն իշխանութեան որեւէ ներկայացուցիչ չէր մեկնել Արցախ:
ԱԺ փոխնախագահ Իշխան Սաղաթելեանը մեզ հետ զրոյցում նշեց, որ իշխանութիւնը հետեւողականօրէն իր քայլերով, գործողութիւններով փորձում է ոչ միայն մոռացութեան տալ, այլ նաեւ հիմնաւորել այն ամէնը, ինչ տեղի է ունեցել.
«Փորձում են հիմնաւորել, թէ Արցախի կորուստը բնական էր, այդպէս էլ պէտք է լինէր, փորձեցին նաեւ հիմնաւորել, որ այդ տարածքներից շատերը «դժբախտ ու դժգոյն էին», թէ այլ ճանապարհ չկար, քան Արցախի մեծ մասը յանձնելը, որը մեզ համար անընդունելի է: Կառավարութեան ծրագրի քննարկման ժամանակ մենք կոնկրետ հարցադրումներ արեցինք իշխանութեանը, մասնաւորապէս, պահանջում էինք, որպէսզի յայտարարեն, որ Շուշին եւ Հադրութը հայկական տարածքներ են եւ ժամանակաւորապէս բռնազաւթուած են թշնամու կողմից, ցաւօք, այս պատասխանը մենք եւս չլսեցինք, այս իմաստով ամէն ինչ պարզ է»,- ասաց ԱԺ փոխնախագահը:
Սեպտեմբերի 21-ին Հայաստանի Հանրապետութիւնը եւս կը տօնի Անկախութեան հռչակման 30-ամեակը: Ինչպէս ենք մենք նշելու Հայաստանի անկախութեան օրը։
Իշխան Սաղաթելեանն ընդգծեց, որ պարտաւոր ենք անկախութեան տօները պատշաճ մակարդակով նշել, քանի որ դրանք ժողովրդի ինքնագիտակցութեան մէջ պետականութեան եւ անկախութեան արժէքը կարեւորելու լաւ առիթ են.
«Դժբախտաբար, այսօր մեր պետականութիւնը վտանգի տակ է, թշնամին երկու ուղղութիւններով կրակում է Հայաստանի ինքնիշխան տարածքի վրայ, այս իշխանութեան վարած քաղաքականութիւնը համարժէք չէ ստեղծուած իրավիճակին, աւելին՝ այն իրավիճակը, որն այսօր ունենք, գործող իշխանութեան ձախողման եւ անկարողութեան արդիւնք է: Մենք կարեւոր խնդիր ունենք արժեւորելու անկախութեանը նուիրուած տօները»,- ասաց Սաղաթելեանը եւ յաւելեց, որ դրանք նաեւ լաւ առիթ են ճիշտ քաղաքական ուղերձներ յղելու առումով:
Իշխան Սաղաթելեանը նաեւ յայտնեց, որ ընդդիմութիւնը քննարկում է անկախութեան օրուան նւիրուած միջոցառումներ իրականացնել, բայց դեռ վերջնական որոշում սրա վերաբերեալ չունեն:
Ընդդիմութեան խորհրդարանական լծակները իշխանութեան ոչ հայանպաստ քայլերը կանխելու առումով այդպէս էլ արդիւնք չտուեցին: Իշխանութիւնը շարունակում է միանձնեայ օրէնքի նախագծեր բերել, որոնք առնչութիւն չունեն յետպատերազմեան շրջանում Հայաստանում եւ Արցախում առաջացած մի շարք խնդիրների լուծմանը եւ ընդունել այդ նախագծերը:
Իշխան Սաղաթելեանից հետաքրքրուեցինք, այս պարագայում արդեօ՞ք ընդդիմութիւնը դիտարկում է փողոցային պայքարին անցնելու տարբերակը, ինչին ի պատասխան վստահեցրեց, թէ փողոցային պայքարը շարունակում է մնալ առաջնահերթութիւն ընդդիմութեան օրակարգում.
«Մենք առաջին օրուանից ենք ասել, որ փողոցային պայքարից չենք հրաժարւելու, պէտք է նախապատրաստուել, կազմակերպուել, դրա անհրաժեշտութիւնը տեսնում ենք: Մենք ասել ենք, որ խորհրդարանի մանդատներն ընդամէնը լրացուցիչ հնարաւորութիւն եւ գործիքներ են: Չնայած բոլոր դժուարութիւններին՝ ես կարծում եմ, որ այս ընթացքում մենք մեր հասանելիքը խորհրդարանում արել ենք, առաջիկայում տարբեր ձեւերով եւ գործիքակազմով կ’օգտուենք այդ հնարաւորութիւններից, բայց փողոցային պայքարը շարունակում է մնալ առաջնահերթութիւն: Այն գործընթացում, որով մենք խորհրդարանում քաղաքական մեծամասնութեան հակահայ քայլերը չկարողանանք կանխել, պէտք է մասնակից դարձնենք մեր հասարակութեանը եւ այդ ճանապարհով փորձենք խնդիրը լուծել»,- եզրափակեց Իշխան Սաղաթելեանը: