Արցախի Գերագոյն խորհուրդի առաջին նախագահ Արթուր Մկրտչեանի մահուան 26-րդ տարելիցը նշուեցաւ Ստեփանակերտի մէջ
Ապրիլի 14-ին կը լրանայ Արցախի Գերագոյն խորհուրդի առաջին նախագահ Արթուր Մկրտչեանի մահուան 26-րդ տարելիցը: Այդ առիթով Արցախի Հանրապետութեան Ազգային Ժողովի (ԱԺ) պատգամաւորներ՝ ԱԺ նախագահ Աշոտ Ղուլեանի գլխաւորութեամբ, ՀՅԴ Արցախի Կեդրոնական Կոմիտէի անդամներ, Արթուր Մկրտչեանի կուսակցական ընկերներն ու հարազատները, ինչպէս նաև Արցախի քաղաքացիներ ծաղիկներ զետեղեցին անոր յուշաքարին:
1988-ի Փետրուար 12-ին Հադրութի հանրահաւաքով սկիզբ առաւ ղարաբաղեան ազգային ազատագրական շարժումը: Հանրահաւաքի մասնակիցները պահանջեցին Հայաստանի հետ Արցախի վերամիաւորումը: Հանրահաւաքի կազմակերպիչը Հադրութի երկրագիտական թանգարանի տնօրէն Արթուր Մկրտչեանն ու «Կռունկ» կոմիտէի իր գործակիցներն էին:
Արթուր Մկրտչեան ծնած է 1959 թուականի Փետրուարի 16-ին, Հադրութի շրջանի Էդիլլու (այժմ՝ Ուխտաձոր) գիւղին մէջ։ 1981 թուականին աւարտած է Երեւանի պետական համալսարանի պատմութեան ֆակուլտետը: Աշխատած է Հայաստանի ազգագրութեան պետական թանգարանին մէջ։ 1983-1986 ուսումը շարունակած է Մոսկուայի Միկլուխոյ Մակլայի անուան ազգագրութեան համալսարանին մէջ։՚
1986 վերադարձած է հայրենիք եւ նշանակուած է Հադրութ շրջկեդրոնի պատմաերկրագիտական թանգարանի տնօրէն։ 1990 թուականին ներկայացուցած է բարձրագոյն ուսման իր աւարտաճառը «Լեռնային Ղարաբաղի հայերի հասարակական կենցաղը. 19-րդ դարի վերջ, 20-րդ դարի սկիզբ»։ ՚
1991 թուականի Դեկտեմբերին ընտրուած է Գերագոյն խորհուրդի պատգամաւոր, 1992-ի Յունուարին՝ Գերագոյն խորհուրդի նախագահ։ Երբ սկսաւ Արցախեան շարժումը, ան դարձաւ շարժման առաջամարտիկներէն եւ դարձաւ Հադրութի ինքնապաշտպանութեան հրամանատարներէն մէկը։
1992-ի Ապրիլի 14-ին կնքեց իր մահկանացուն։ Լեռնային Ղարաբաղի Գերագոյն խորհրդի, անկախ հանրապետութեան խորհրդարանի առաջին նախագահը, որ պաշտօնավարեց ընդամէնը 97 օր, դարձաւ Արցախի պետականութեան խորհրդանիշը։
