Ամերիկայի Հայ Աւետարանչական Ընկերակցութեան Արցախի Մանկապարտէզներու Ամավերջի Հանդիսութիւնները

Ամերիկայի Հայ Աւետարանչական Ընկերակցութեան Արցախի մանկապարտէզները իրենց գործունէութեան ընթացքին, հազարաւոր մանուկներու կրթութեան առաջին հանգրուանը եղած են, ուր դրսեւորուած են կեանքի յաջորդ փուլի համար անհրաժեշտ հիմքերը։

Կրթօճախները իրենց նուիրական աշխատանքը կատարած են ժահրի, ռազմական դրութեան և շրջափակման պայմաններու մէջ։ Հոսանքի և կազի պարբերական անջատումները, վառելանիւթի և սնունդի բացակայութիւնն ու պակասը մանկապարտէզի առօրեայ աշխատանքը դարձուցած են դժուար, սակայն ո՛չ անհնարին։

Ուսումնական տարին իր բնականոն հունով աւարտեցաւ։

Այսպէս, Ամերիկայի Հայ Աւետարանչական Ընկերակցութեան Մարտակերտի, Ասկերանի և Ստեփանակերտի մանկապարտէզներու 125 սաներ շրջափակման պայմաններու մէջ հրաժեշտ տուին հարազատ կրթօճախներուն՝ դպրոցի համար անհրաժեշտ գիտելիքներու եւ կարողութիւններու պաշարով։ Հրաժեշտի հանդիսաւոր ձեռնարկներ տեղի ունեցան, որոնց ընթացքին երեխաները երգեցին, պարեցին, արտասանեցին․․․

Բարի աւանդոյթի համաձայն, հակառակ շրջափակման դժուարութիւններուն, Ընկերակցութիւնը բոլոր շրջանաւարտ մանուկներուն ապահոված էր գրենական պիտոյքներ։

«Ճանպազեան» Մանկապարտէզ, Մարտակերտ

Մարտակերտի Վեր. Դոկտ. Մովսէս Ճանպազեանի անուան մանկապարտէզի աւագ խումբի սաներու «Հրաժեշտ մանկապարտէզին» խորագրով տարեվերջեան աւարտական միջոցառումը  տեղի ունեցաւ Յունիս 17-ին Մարտակերտի մշակոյթի և երիտասարդութեան կեդրոնի դահլիճին մէջ:

Աւագ խումբի սաները հանդէս եկան համերգային ծրագրով՝ ասմունքով, երաժշտական, պարային համարներով՝  նուիրուած հայրենիքին, մանկապարտէզին, դաստիարակներուն եւ ծնողներուն: Հնչեցին շնորհակալական խօսքեր մանկապարտէզի աշխատակիցներու նկատմամբ՝  մայրաբար սիրելու, դաստիրակելու, ջանք ու եռանդ չխնայելու և ամէն օրը հեքիաթ դարձնելու, երաժշտական ճաշակ զարգացնելու համար:

Աւարտական վկայականներու յանձնումէն ետք, աւագ խումբի սաները գալիք սերունդին փոխանցեցին խորհրդանշական բանալին, որ կը բանայ հրաշքներուէ աշխարհ տանող դուռը: Մանկապարտէզի տնօրէն Գայանէ Ալեքսանեանը ևս շնորաւորեց երեխաներուն, մաղթելով բարի ճանապարհ, բարի երթ դէպի նոր գիտելիքներու աշխարհ:

«Պաղտիկեան» Մանկապարտէզ, Ստեփանակերտ

Յունիսի 27-ին, Ստեփանակերտի Յակոբ եւ Լիտիա Պաղտիկեաններու անուան մանկապարտէզին մէջ աւարտական հանդէս տեղի ունեցաւ։ «Ապրե՛նք, որ ապրի Արցախը․․․» խորագիրը կրող միջոցառումը շուրջ 200 օր շրջափակման մէջ գտնուող մանուկներու ոսկէյոյս հեքիաթն էր  խաղաղութեան, բարութեան, ընկերութեան, Արցախի ու աշխարհի մանուկներու երազանքների մասին։ Երեխաները հանդէս եկան երգ ու պարով, ասմունքով ու բեմադրութեամբ։ Երեխաները իրենց հաստատակամ որոշումը յայտնեցին Արցախ ապրելու և մեր հայրենիքը ապրեցնելու մասին։

Հանդէսի աւարտին մանուկներուն բարի մաղթանքի խօսք ուղղեց մանկապարտէզի տնօրէն Նունէ Բաբայեանը և երեխաներուն յանձնեց ընկերակցութեան տրամադրած նուէրները։

«Պասմաճեան» Մանկապարտէզ, Ասկերան

Յունիս 29-ին Եփրեմ եւ Զապել Պասմաճեաններու անուան Ասկերանի մանկապարտէզի միջին խումբի աւարտական հանդէսն էր։ Փոքրիկներն ուրախ տրամադրութեամբ ասմունքեցին, երգեցին ու պարեցին, հակառակ ամիսներէ ի վեր շարունակուող շրջափակման։

«Նրանք են մեզ այսօր ապրեցնում մեր հայրենիքում։ Նրանք են եկել այսօր համայն աշխարհին ասելու, որ մենք ուզում ենք խաղաղ մանկութիւն ունենալ սեփական հայրենիքում։ Այսօր նրանք ուզում են ապրել իրենց սուրբ հայրենիքում, որտեղ ապրել ու արարել են մեր պապերը», ըսաւ մանկապարտէզի տնօրէն Անահիտ Դանիէլեանը։

«Այո՛, մանկութեանը պէտք է ցոյց տալ մեծագոյն յարգանք․․․ Թող Աստուած ուժ, յամբերութիւն, կորով, խաղաղութիւն պարգևի՝ մեր մանուկների կեանքի ոսկեյոյս հեքիաթն Արցախում իրականացնելու համար․․․ և թող օրերը Արցախի և աշխարհի բացուեն բարի լուրերով, խաղաղ ու անհոգ…», ըսաւ Արցախի մէջ Ամերիկայի Հայ Աւետարանչական Ընկերակցութեան ներկայացուցիչ Վիքթոր Կարապետեանը։