ԱԺ «Հայաստան» խմբակցութեան յայտարարութիւնը

2025 թ. Օգոստոսի 8-ին ԱՄՆ-ում Նիկոլ Փաշինեանի կողմից եռակողմ հանդիպման յայտարարութեամբ ստանձնած պարտաւորութիւնները, ինչպէս նաեւ Հայաստանի եւ Ատրպէյճանի միջեւ նախաստորագրուած համաձայնագիրը, որոնց չհիմնաւորուած կարեւորութիւնը շեշտում եւ քարոզում են փաշինեանական ռեժիմի ներկայացուցիչները, որեւէ առնչութիւն չունեն իրական խաղաղութեան հետ: Աւելին, դրանք պարունակում են Հայաստանի եւ հայ ժողովրդի համար գոյաբանական նոր սպառնալիքներ:

Մասնաւորապէս՝

1. դրանցով փորձ է արւում լեգիտիմացնել Ատրպէյճանի կողմից արցախահայութեան նկատմամբ իրականացուած էթնիկ զտումն ու ցեղասպանական քաղաքականութիւնը, պատանդառութիւնն ու շինծու դատավարութիւնները, Արցախից հայկական հետքի վերացումը, Մինսկի խմբի լուծարմամբ՝ արցախեան հիմնահարցը միջազգային օրակարգից դուրս մղելը, Հայաստանի ինքնիշխան տարածքների բռնազաւթումը,
2. դրանք ոչ միայն չեն վերացնում Հայաստանի նկատմամբ թուրք-ատրպէյճանական երեք տասնամեակից աւելի տեւող շրջափակումն ու թշնամական գործողութիւնները, այլեւ Ատրպէյճանը անխոչընդոտ կապ-միջանցք է ստանում Հայաստանի սուվերեն տարածքում՝ ստեղծելով Հայաստանի ինքնիշխանութեան սահմանափակումների եւ ագրեսիան շարունակելու յաւելեալ պայմաններ,
3. ստորագրուած փաստաթղթերում չկան միջազգային կոնֆլիկտների լուծման արդարութեան չափանիշները, մարդու ազատութիւնների եւ հիմնարար իրաւունքների ապահովման եւ պաշտպանութեան միջազգային յանձնառութիւնները,
4. նախաստորագրուած համաձայնագիրը (մասնաւորապէս, յօդուած 8-9, յօդուած 15) պարունակում է ձեւակերպումներ, որոնք ակնյայտօրէն օգտագործուելու են արցախեան ազատագրական պայքարին մասնակցած բոլոր հայորդիների դէմ, քողարկում են ատրպէյճանական յանցագործութիւնները, ինչպէս նաեւ զրկում են հայկական կողմին այդ յանցագործութիւնների հեղինակներին պատասխանատուութեան ենթարկելու միջազգային գործիքակազմ օգտագործելու հնարաւորութիւններից,
5. անգամ ստորագրուած փաստաթղթերում ձեւականօրէն հռչակուած տարածքային ամբողջականութեան սկզբունքի յարգման, խաղաղութիւն հաստատելու փոխադարձ կամքի, միմեանց ներքին գործերին չմիջամտելու ձեւակերպուած դրոյթները ոչ մի միջազգային երաշխիք չեն նախանշում: Հաշուի առնելով ստեղծուած իրավիճակը, դրանք հիմնուած են բացառապէս Ատրպէյճանի ցանկութեան վրայ: Իսկ այն նախապայմանները, որոնք Ատրպէյճանը ներկայումս առաջադրում է (Անկախութեան հռչակագրից հրաժարում, սահմանադրական փոփոխութիւններ եւ այլն), վկայում է վերջինիս ակնյայտ հակառակ ցանկութեան մասին:

Տարածաշրջանային իրական խաղաղութիւնը եւ երկարատեւ կայունութիւնը՝ հիմնուած ազգերի ազատ ինքնորոշման վրայ, պահանջում է շահերի բազմակողմ համադրում, ուժերի իրական հաւասարակշռութիւն, միջազգային երաշխիքների առկայութիւն: Մեր կողմից անհրաժեշտ է ապահովել Հայաստանի ներքին եւ արտաքին անվտանգութեան համակարգերի ամրապնդում, ներազգային համերաշխութեան հաստատում, ազգային-պետական ինստիտուտների ամրացում, ինչպէս նաեւ արտաքին դաշնակիցների ներգրաւում:

Առանց վերը նշուած հարցերի՝ ներկայացուած փաստաթղթերը բացառապէս փաստում են հայկական կողմին հասցուող մեծ վնասի մասին:
Նիկոլ Փաշինեանը, հերթական անգամ չարաշահելով Սահմանադրութեամբ եւ օրէնքներով սահմանուած իր լիազօրութիւնները, խախտելով կառավարութեան ստանձնած հանրային-իրաւական պատասխանատուութիւնը, կեղծ խաղաղութեան քարոզով մոլորութեան մէջ է փորձում գցել հայ ժողովրդին՝ նպատակ ունենալով ապահովել իր ռեժիմի վերարտադրութիւնը:

Սիրելի՛ հայրենակիցներ,

Մենք մերժում ենք նման գործելաոճը, անընդունելի եւ դատապարտելի ենք համարում Հայաստանին պարտադրուող հերթական զիջումները, վերահաստատում ենք, որ հնարաւոր է դուրս գալ մեր ժողովրդին պարտադրուող պարտութիւնների այս արատաւոր շղթայից, վերականգնել մեր ազգային արժանապատուութիւնն ու կերտել ամուր պետականութիւն: Այս ամէնը հնարաւոր է իրականացնել՝ բացառելով ազգային ողբերգութեան հեղինակ-Հայաստանի գործող ռեժիմի վերարտադրութիւնը:

ԱԺ «Հայաստան» խմբակցութիւն
12 Օգոստոսի, 2025 թ.