Ազրպէյճան Բռնագրաւած Հադրութի Շրջանին Մէջ Հայկական Եկեղեցի Քանդած Է

Կովկասեան ժառանգութեան պաշտպանութեան միջազգային կազմակերպութիւնը կ՛ահազանգէ բռնագրաւած Արցախի Հադրութի շրջանին մէջ գտնուող հայկական եկեղեցւոյ քանդման մասին, որ կը փաստէ ՄԱԿ-ի միջազգային դատարանի որոշման խախտման մասին:

2022 թուականի ամրան Կովկասեան ժառանգութեան պաշտպանութեան միջազգային կազմակերպութիւնը արձանագրած էր 2020 թուական 44-օրեայ պատերազմէն ետք Ազրպէյճանի իշխանութեան տակ անցած Հադրութի շրջանի Մոխրենես գիւղի գրեթէ ամբողջական քանդումը: Հիմնովին քանդուած կառոյցներուն կարգին էր նաեւ Մոխրենեսի Սուրբ Սարգիս հայկական եկեղեցին, որ կառուցուած էր 18-19-րդ դարերուն:

Սակայն, ինչպէս նշուած է հրապարակման մէջ, Սուրբ Սարգիս եկեղեցւոյ քանդումը, ըստ ամենայնի, վերջին քայլը չէր ազրպէյճանական միջամտութեան առումով, որովհետեւ կազմակերպութիւնը իր շարունակական դիտարկման ընթացքին փաստագրած է ապացոյցներ` հետագայ շինարարական աշխատանքներու վերաբերեալ:

Կազմակերպութիւնը կը յիշեցնէ, որ Ազրպէյճանը պարտաւոր է պաշտպանել հայկական մշակութային ժառանգութիւնը եւ կանխել Մոխրենեսի մէջ հայկական դարաւոր մշակութային եւ կրօնական կեանքը ջնջելու որեւէ փորձ:

«2022 թուականին եկեղեցւոյ քանդումը Միջազգային դատարանի 2021 թուականի դեկտեմբերին միջանկեալ միջոցի առաջին փաստագրուած խախտումն է», նշուած է կազմակերպութեան հրապարակումին մէջ: Ըստ Կովկասեան ժառանգութեան պաշտպանութեան միջազգային կազմակերպութեան, հարց կը յառաջանայ, թէ ինչպէ՞ս պիտի արձագանգէ Արդարադատութեան միջազգային դատարանը իր վճիռներուն խախտումներուն եւ զանոնք քողարկելու փորձերուն:

Յիշեցնենք, որ Արդարադատութեան միջազգային դատարանը 2021 թուականի դեկտեմբեր 7-ին որոշած էր պարտադրել Ազրպէյճանին` «Ձեռնարկել բոլոր անհրաժեշտ միջոցները` կանխելու եւ պատժելու վանտալիզմի եւ պղծման գործողութիւնները` ուղղուած հայկական մշակութային ժառանգութեան, ներառեալ` եկեղեցիներու եւ այլ պաշտամունքի վայրերու, յուշարձաններու, տեսարժան վայրերու, գերեզմանատուներու դէմ»: