Գործով Վկայենք Ազատ Ապրելու Մեր Վճռականութիւնը

20 սեպտեմբեր 2016-ին, Հայ յեղափոխական դաշնակցութիւնը Հայաստանի անկախութեան վերականգնման 25-ամեակին առիթով հայ ժողովուրդին յղեց հետեւեալ ուղերձը.-

Սիրելի՛ հայրենակիցներ,

Արդէն 25 տարի իրականութիւն է մեր պատմական հայրենիքի մի հատուածում վեր յառնած հայոց նոր պետականութիւնը: Վերանորոգուած անկախութեան յոբելեանական տարեդարձը առիթ է միմեանց շնորհաւորելու, ոգեւորելու, արժեւորելու ձեռքբերումները, մատնանշելու ձախողումներն ու դրանք շտկելու ուղիները:

Անկախ պետականութիւնը մշտապէս բարձրագոյն արժէք է եղել հայ ժողովրդի համար: Մեր հայրենիքը գրեթէ միշտ գտնուել է ազգային-կրօնական, աշխարհաքաղաքական վայրիվերումների ու տեղաշարժերի կիզակէտում: Դա է պատճառը, որ հայ ժողովրդի պատմութիւնը յատկանշւում է իր ազգային պետականութեան պահպանման կամ անկախութեան վերականգնման տեւական պայքարով: Պայքար, որի արդիւնքում հինգհազարամեայ մեր պատմութեան ընթացքում քանիցս կարողացել ենք վերանորոգել մեր պետականութիւնը, վերահաստատել մեր գոյութեան իրաւունքը: Մեր լինելիութեան իրաւունքը հերթական անգամ մենք վերահաստատեցինք 1991 սեպտեմբերի 21-ին:

1991 թուականի սեպտեմբերի 21-ից տասն օր առաջ  ՀՅ Դաշնակցութիւնը հանդէս եկաւ ժողովրդին ուղղուած հետեւեալ կոչով.

«Հայրենակիցնե՛ր,

 վճռական ընտրութիւն ենք կատարելու ամէնքս սեպտեմբերի 21-ին: Ուզո՞ւմ ենք անկախ ապրել, ուզո՞ւմ ենք ազատ ապրել, ուզո՞ւմ ենք ինքներս տնօրինել մեր ճակատագիրը, թէ` ոչ: Հայ յեղափոխական դաշնակցութիւնը վստահ է, որ հայ ժողովրդի պատասխանը միանշանակ է լինելու` ԱՅՈ:

… մենք վայրկեան իսկ չենք կասկածում, որ այս արժանապատիւ ընտրութեամբ նոր քայլ ենք անելու մեր ազգային նպատակների իրագործման, իւրաքանչիւր հայի երջանկութեան ապահովման ճանապարհին:

Սեպտեմբերի 21-ին իւրաքանչիւրիս Այո-ն մեր ընծայումն է հայրենիքին: Կատարենք մեր պարտքը: Վկայենք ազատ ապրելու մեր վճռականութիւնը»:

Անկախ պետականութեան արժեւորման առումով մենք այսօր էլ նոյն դիրքերում ենք: Ճիշդ է` մեր նոր պետականութիւնն արդէն 25 տարեկան է, եւ մենք իրաւունք ունենք խստապահանջ լինելու, բայց ճիշդ է նաեւ, որ մեր պետականութիւնը տակաւին 25 տարեկան է, եւ մենք պարտաւոր ենք յաւելեալ ջանքեր ներդնել: Մարդկանց արժանապատիւ կեանքի համար պայմաններ ստեղծելու, հասարակութեանը համախմբելու առումով մենք հսկայական անելիք ունենք: Քաղաքական ռոմանտիզմի ժամանակները պէտք է թողնենք անցեալում, եւ իւրաքանչիւրս մեր տեղում ու մեր չափով ներդրում ունենանք հայրենի պետականութեան շէնացման գործում: Պետութեան կայունութիւնը, պաշտպանունակութիւնն ամրապնդելը, երկրի հեղինակութեան աճը մեր բոլորի պարտականութիւնն է:

Առհասարակ` անկախ պետականութիւնը ազգի ինքնակազմակերպման բարձրագոյն եղանակն է, նրա  բնականոն առաջընթացի նախապայմանը: Իբրեւ աշխարհասփիւռ ժողովուրդ` Հայաստանի Հանրապետութիւնը կոչուած է լինել համայն հայութեան հայրենիքն ու նրա շահերի պաշտպանը: Ըստ այդմ էլ` հայկական անկախ պետականութեան հզօրացումն ու ամրապնդումը պէտք է դառնայ համայն հայութեան գերխնդիրը: Մեր պատմական հայրենիքի մի հատուածում վեր յառնած հայոց նոր պետականութիւնը մեր խտացուած հայրենիքն է, որ զսպանակուած ուժականութիւն ունի հզօրանալու եւ ծաւալուելու, ինչի առհաւատչեան է ազատագրուած Արցախը: Մենք պէտք է հաւատանք մեր ուժերին, յաղթահարենք հիասթափութիւնները, մերժենք մեզ պարտադրուած կեղծ արժէքները: Մենք կարող ենք եւ պէտք է զարգանանք` առանց զիջելու:

Մեր անկախ պետականութիւնը մեր արժանապատուութիւնն է ու մեր հպարտութիւնը, մենք այն սրբութեամբ պէտք է պահպանենք: Եթէ մենք մեր արժանապատուութեանն ու հպարտութեանը տէր չկանգնենք, ո՛չ ոք մեզ չի յարգի, ո՛չ ոք մեզ հետ հաշուի չի նստի:  Ցաւօք, այսօր եւ՛ Հայաստանում, ե՛ւ սփիւռքում կան մարդիկ, ովքեր դեռ չեն ընդունում այս պարզ ճշմարտութիւնը: Եւ սրա հիմնական պատճառը մեր պետութեան ներսում տիրող անարդարութիւններն ու յոռի բարքերն են: Մեզանում արմատաւորուած այս երեւոյթները աւելի վտանգաւոր են եւ կործանարար, քան ցանկացած արտաքին թշնամի: Այս վիճակն է, որ պէտք է օր առաջ փոխուի եւ փոխուի արմատապէս: Սա պէտք է դառնայ  համազգային պահանջ, գործողութիւնների յստակ, վստահութիւն ներշնչող ծրագիր եւ նուիրուած աշխատանք:

Քաղաքացի լինելու, քաղաքացի դաստիարակելու խնդիր ունենք, քանզի ազատ քաղաքացին է պետականութեան նեցուկն ու յենարանը: Մեր պարագայում առաւել եւս այդպէս է. ժամանակակից աշխարհում մեր կարեւորագոյն մրցակցային առաւելութիւնը մարդն է, մեր մարդկային ներուժը:

Անցնող տարիների ընթացքում պետականաշինութեան գործում հայկական սփիւռքի ներդրումը զգալի է եղել: Սփիւռքն էր, որ տասնամեակներ շարունակ անթեղուած պահեց անկախութեան կրակը, հայրենիքից դուրս կերտեց հոգեւոր Հայաստան, իսկ վերանկախանալուց յետոյ զօրավիգ եղաւ Հայաստանին ու Արցախին:

Հայութեան առջեւ ծառացած մարտահրաւէրներին մենք ի զօրու ենք դիմակայել, եթէ առաջնորդուենք համահայկական օրակարգերով, լինենք համախմբուած, գործենք միասնաբար: Ժամանակակից համաշխարհայնացուող աշխարհում մենք ունենք համեմատական մրցակցային առաւելութիւններ, որ լիարժէք չենք օգտագործում: Հայրենիքում, թէ արտերկրում, իշխանութեան կազմում, թէ ընդդիմութեան մէջ, մարտի դաշտում, թէ քաղաքացիական կեանքում մեր գործը մշտապէս պէտք է ուղղուած լինի հայոց պետականութեան կայացմանը ու հզօրացմանը:

Մենք պէտք չէ թուլացնենք մեր զգօնութիւնը, Հայաստանն ու Արցախը, ըստ էութեան, դեռ պատերազմի ու շրջափակման մէջ են: Մեր պետականութեան կայացմանն ու հզօրացմանը զուգահեռ` մենք նաեւ հողահաւաքի եւ հայահաւաքի խնդիր ունենք: Մենք պարտաւոր ենք կերտել մեր պատմութեան փառահեղ նոր էջը:

Մնում է հաւատալ, մնում է կազմակերպ աշխատանքով արմատախիլ անել մեր պետականութեան զարգացմանը խոչընդոտող բոլոր արատաւոր երեւոյթները: Մնում է սիրենք միմեանց եւ նայենք առաջ, նայենք նոյն ուղղութեամբ:

Վստահ ենք` այդ ճանապարհը մեզ է վերադարձնելու 1991 թուականի սեպտեմբերի 21-ի խանդավառութիւնը: Այդ ճանապարհը մեզ տանելու է դէպի ազատ, բարեկեցիկ, հզօր ու միացեալ Հայաստան:

ՀԱՅ ՅԵՂԱՓՈԽԱԿԱՆ ԴԱՇՆԱԿՑՈՒԹԻՒՆ