Ֆրանսայի Տեսին քաղաքը հայկական կը դառնայ. Ճորքայէֆները` ոտնագնդակի եւ քաղաքականութեան մէջ
Ֆրանսական Տեսին քաղաքին մէջ կը զգաս, թէ Հայաստանի մէջ ես։ Այստեղ փոխքաղաքապետը արմատներով հայ է, քաղաքապետը` սկզբունքներով։
Sputnik Արմենիան հարցազրոյց մը ունեցած է Տեսինի փոխքաղաքապետ Տենի Ճորքայէֆի հետ։
Ֆրանսական Տեսին քաղաքը յաճախ կ՚անուանեն «Փոքրիկ Հայաստան»։ Անոր համար ահագին պատճառներ կան։ Օրինակ` Տեսինի 26 հազար բնակչութեան գրեթէ կէսը` 42 տոկոսը, հայեր են։ Փոխքաղաքապետն ալ հայ է։ Ան Ֆրանսայի մարզական ամենայայտնի ընտանիքներէն մէկէն է։
Ճորքայէֆները առաւելապէս յայտնի են որպէս Ֆրանսայի Ֆութպոլի հաւաքականի մարզիկներ։ Մարզական ընտանիքէն մէկը որոշեց բռնել քաղաքականութեան ուղին։ Ան Տենի Ճորքայէֆն է, Եուրիի եղբայրը։ Հիմա Տեսինի քաղաքապետի մշակութային եւ միջազգային հարցերով զբաղող տեղակալն է։ Sputnik Արմենիայի հետ զրոյցին ընթացքին Ճորքայէֆ յայտնեց, թէ իր աշխատանքը, մեծ մասամբ կը ծառայեցնէ հայերուն։
Տենի Ճորքայէֆ, Շառլ Ազնաւուր եւ Եուրի Ճորքայէֆ
«Մշակութային այն միջոցառումները, զորս կը կազմակերպեմ, հիմնականօրէն կը միտին հայկական մշակոյթի տարածման, բայց քաղաքական հարցերէն ալ անմասն չեմ մնար», ըսաւ Տենիսի հայազգի փոխքաղաքապետը։
Օրինակ` Մարսէյլի փոխքաղաքապետ Տիտիէ Բարակեանի հետ ան ստեղծած է ֆրանսացի ընտրուող պաշտօնական անձերու միաւորում։ Այդպիսով, ցանկացեր են ստեղծել լոպիիստական ուժ եւ Հայաստանի գործընկերը դառնալ։ Ամենահետաքրքրականը այն է, որ ո՛չ ան, ո՛չ ալ իր ծնողքը Հայաստան չեն ծնած։ Ան կը խոստովանի, թէ պատասխանը պէտք է գտնել ծինային յիշողութեան մէջ։
Հայկականութեան գրաւչութիւնը ան փոխանցած է իտալական արմատներով ֆրանսացի քաղաքապետ Լորէն Ֆոտրային, որ, կարծես, միացեր է հայկական մեծ ընտանիքին։
«Լորէն Ֆոտրային շատ կը հետաքրքրէ Հայկական հարցը, ան կը պաշտպանէ արցախեան թեման, 3 անգամ միասին եկած ենք Հայաստան եւ Արցախ։ Մեր քաղաքապետը հանդիպեր է նաեւ Արցախի նախագահ Բակօ Սահակեանի հետ։ Ան գիտէ մեր պատմութիւնը, այս մէկը շատ կարեւոր է», ըսաւ ան։
Առհասարակ, ինչպէս կը պատմէ Ճորքայէֆը, Տեսինի մէջ հայերուն հետ յարգանքով կը վերաբերին։ Հայերը աշխատասէր են, խելացի ու խաղաղասէր։
«Հայերը Տեսինի մէջ լաւապէս համարկուած են ֆրանսական կեանքին։ Այստեղ միշտ կ՚ըսեն, որ հայերը որպէս օրինակ կը ծառայեն միւսներուն, որովհետեւ անոնք մեծ առեւտրականներ են, կը մասնակցին Ֆրանսայի տնտեսութեան զարգացման», պատմեց Ճորքայէֆ։
Հիմա Տեսինի մէջ գրեթէ ամէն ինչ Հայաստանը կը յիշեցնէ։ Նախ՝ Եւրոպայի մէջ Հայոց ցեղասպանութեան առաջին յուշարձանը կառուցուած է այստեղ` 1972 թուականին։ Տեսինի մէջ կան հայկական եկեղեցի, մշակոյթի տուն, հայկական հրապարակ, հայերէն անուանումներով խանութներ ու «Ապրիլ 24» անուամբ փողոց։
Տենի Ճորքայէֆի զաւակները շատ լաւ հայերէն կը խօսին, իսկ տարին մի քանի անգամ Հայաստան կ՚այցելեն։ Տեսինի փոխքաղաքապետը կը պաշտէ Հայաստանն ու տարին 3–4 անգամ կ՚այցելէ զայն։ Վերջին անգամ Հայաստան եկած է այս տարուան Սեպտեմբերին։ ՀՀ նախագահ Սերժ Սարգսեանի հրամանագրով՝ Հայաստանի Հանրապետութեան անկախութեան 26-րդ տարեդարձին առթիւ ֆրանսահայ անուանի ոտնագնդակի մարզիկ Եուրի Ճորքայէֆը պարգեւատրուած է Երախտագիտութեան մետալով: Մետալը պաշտօնական արարողութեան ընթացքին ստացեր է եղբայրը՝ Տենի Ճորքայէֆը։
Գոհար Սարգսեան