Ընդդիմադիր երեք ուժեր Սահմանադրական դատարան պիտի դիմեն՝ վիճարկելու ընտրութիւններու արդիւնքները
- (0)
ԵՐԵՒԱՆ․ Ընդդիմադիր «Ուժեղ Հայաստան», «Հայաստան» դաշինքը եւ «Բարգաւաճ Հայաստան» կուսակցութիւնը յայտարարած են, որ այս ուրբաթ պիտի դիմեն Սահմանադրական դատարան՝ պահանջելով անվաւեր ճանաչել խորհրդարանական ընտրութիւններու արդիւնքները։
«Ուժեղ Հայաստան»-ի ներկայացուցիչ Գոհար Մելոյանը նշած է, թէ ԲՀԿ-ի խորհրդարան անցնելու հարցը դեռ փակուած չէ եւ Սահմանադրական դատարանը կրնայ չեղարկել Կեդրոնական ընտրական յանձնաժողովի որոշումը, նոր ամփոփիչ որոշում ընդունիլ եւ լիազօրութիւններու (մանդատներու) նոր բաշխում սահմանել, որով ԲՀԿ-ն կրնայ յայտնուիլ Ազգային ժողովին մէջ։
Նոյն տեսակէտը արտայայտած է նաեւ «Հայաստան» դաշինքի եւ ՀՅԴ Հայաստանի Գերագոյն մարմինի ներկայացուցիչ Իշխան Սաղաթելեանը՝ ընդգծելով, որ եթէ Սահմանադրական դատարանը առաջնորդուի Սահմանադրութեամբ, ԲՀԿ-ի մուտքը խորհրդարան պէտք է ապահովուի։ Ան նաեւ յայտնած է, որ ընդդիմադիր ուժերը լիազօրութիւնները ընդունելու կամ մերժելու վերջնական որոշումը պիտի կայացնեն միայն Սահմանադրական դատարանի վճիռէն ետք։
ԲՀԿ-ն նոյնպէս կը պատրաստէ իր դիմումը Սահմանադրական դատարան։ Օրէնքով սահմանուած ժամկէտը այս ուրբաթ է, իսկ դատարանը դիմումները ընդունելէ ետք 15 օրուան ընթացքին պէտք է վերջնական որոշում կայացնէ։
