Էրտողան կը վերահաստատէ Անգարայի զօրակցութիւնը Ատրպէյճանին ՝ Հայաստանի հետ բանակցութիւններուն մէջ
- (0)
ԱՆԳԱՐԱ.- Թուրքիոյ նախագահ Ռեճեփ Թայիփ Էրտողան հոկտեմբեր 30-ին, Անգարայի մէջ կայացած Թրքական Պետութիւններու Կազմակերպութեան 13-րդ վեհաժողովին ընթացքին, վերահաստատած է իր երկրի զօրակցութիւնը Ատրպէյճանին՝ Հայաստանի հետ ընթացող բանակցութիւններուն մէջ։
Իր ելոյթին ընթացքին Էրտողան յայտարարած է, թէ Թուրքիա կ՚ողջունէ Ատրպէյճանի եւ Հայաստանի միջեւ հաստատուած շփումները եւ պիտի շարունակէ իր կարելիութիւններուն սահմաններուն մէջ նպաստել Հարաւային Կովկասի մէջ մնայուն խաղաղութեան հաստատման։
Թուրքիոյ նախագահը շեշտած է, որ շրջանին մէջ խաղաղութեան եւ կայունութեան հաստատումը տնտեսական ու ռազմավարական նոր կարելիութիւններ պիտի ստեղծէ ոչ միայն տարածաշրջանի երկիրներուն, այլեւ ամբողջ թրքական աշխարհին համար։
Նոյն վեհաժողովին ընթացքին Ատրպէյճանի արտաքին գործոց նախարար Ճէյհուն Պայրամով վերահաստատած է Հայաստանի նկատմամբ Պաքուի քաղաքական եւ իրաւական պահանջները՝ խաղաղութեան համաձայնագիրի ստորագրութիւնը պայմանաւորելով Երեւանի առնելիք յաւելեալ քայլերով։
Այս զարգացումները անգամ մը եւս կը բացայայտեն թուրք-ատրպէյճանական համակարգուած դիրքորոշումին կարեւորութիւնը՝ Հայաստանի հետ յարաբերութիւններու կարգաւորման գործընթացին մէջ։
Թէեւ Նիկոլ Փաշինեանի կառավարութիւնը կը շարունակէ տարածաշրջանային խաղաղութեան եւ հաղորդակցութիւններու բացման իր քաղաքականութիւնը, Անգարա կը պահէ Ատրպէյճանի հետ իր ռազմավարական գործընկերութիւնը՝ առանց յստակ պարտաւորութիւն ստանձնելու Հայաստանի նկատմամբ։
Ընդդիմադիր շրջանակներու համար այս իրավիճակը կը վերահաստատէ այն մտահոգութիւնը, որ հայ-թրքական յարաբերութիւններու կարգաւորումը չի կրնար անկախ դիտուիլ Պաքուի քաղաքական պահանջներէն եւ Հայաստանի անվտանգութեան առջեւ ծառացած սպառնալիքներէն։
Անգարայի խաղաղութեան յայտարարութիւնները, հետեւաբար, պէտք է գնահատուին Թուրքիոյ գործնական քաղաքականութեան եւ Հայաստանի հետ յարաբերութիւններու կարգաւորման ուղղութեամբ առնուած իրական քայլերուն լոյսին տակ։
Related Articles
