Զիջման քաղաքականութիւնը տանելու է ինքնասպանութեան
Մայիսի 9-ին «Երկրի հիւրասրահ»-ի տաղաւարում էր ՀՅԴ Բիւրոյի երկարամեայ ներկայացուցիչ, «Կամաւորական շարժում» ՀԿ նախագահ Հրանդ Մարգարեանը:
Նա ներկայացրել է հայրենիքի պաշտպանութեան հարցով կամաւորական շարժման վերակազմակերպման եւ դրան համահայկականութեան բնոյթ տալու գաղափարը: Որպէս այդ նպատակին հասնելու առաջին քայլ՝ Հրանդ Մարգարեանը կարեւորել է դեռեւս Արցախեան ազատամարտի ժամանակ ձեւաւորուած կամաւորական խմբերի ակտիւացումը եւ նրանց հայրենիքի պաշտպանութեան գործին ուղղորդելը:
«Այլապէս այն քաղաքականութիւնը, որ վարում են ՀՀ իշխանութիւնները մեզ չի կարող խաղաղութիւն ու ապահովութիւն բերել: Թշնամին չի կարող առաջ գալ միայն այն դէպքում, երբ իմանայ, որ կամ կը ջախջախուի, կամ մեծ գին կը վճարի իր այդ քայլի համար: Այս իմաստով, մենք պէտք է կարողանանք համախմբել մեր ուժերը եւ թշնամուն ցոյց տալ, որ չենք պատրաստւում զիջել: Զիջման այս քաղաքականութիւնը մեզ տանում է ինքնասպանութեան», ասել է Հրանդ Մարգարեանը:
Նա անդրադարձել է նաեւ առաջիկայում Կամաւորական շարժում հասարակական կազմակերպութեան նախաձեռնութեամբ Կոռնիձորում կայանալիք ակցիային՝ նշելով, որ կամաւորական շարժման եւ ժողովրդի լայն մասնակցութիւնն այդ խաղաղ ակցիային արդէն իսկ կը վկայի, որ մենք, անկախ ամէն ինչից, պատրաստ ենք պաշտպանելու մեր հայրենիքը:
Հրանդ Մարգարեանը խօսել է նաեւ երկրի ներքաղաքական իրավիճակի մասին, անդրադարձել իշխանութիւն-ընդդիմութիւն յարաբերութիւններին: Նա ընդգծել է, որ ընդդիմութեան այս պահի խեղճութիւնը իրականում հետեւանք է հայրենիքի ապագայի հանդէպ ունեցած պատասխանատուութեան: Հակառակ պարագայում, նշել է նա, ներքաղաքական իրավիճակն այնքան է լարուած, այնպէս են հատուել բոլոր գծերը, որ ընդդիմութեան անպատասխանատուութեան դէպքում Երեւանը մէկ օրում կը վերածուի վերջին օրերի Փարիզին:
«Նիկոլ Փաշինեանը պէտք է հասկանայ, որ իր փրկութիւնը հայրենիքի փրկութեան մէջ է: Եթէ նա ցանկանում է, որ սերունդները իրեն չյիշեն որպէս դաւաճանի, ամէն ինչ պէտք է անի, որ համախմբում առաջանայ: Ինքը պէտք է մտածի՝ որպէսզի ինքը փրկուի, պէտք է երկիրը փրկել: Իսկ դրա համար, երկու բան է անհրաժեշտ՝ միասնական նպատակ եւ ազգային միասնականութիւն», նշել է Հրանդ Մարգարեանը:
Comments are closed.