«Պէտք է Ջաւախքը դառնայ հայ-վրացական յարաբերութիւններու ամենաուժեղ օղակը». Կիրօ Մանոյեան
ՀՅԴ Բիւրոյի հրաւէրով գումարուած է ՀՅԴ աշխարհասփիւռ բոլոր կառոյցներու ներկայացուցիչներու խորհրդակցական ժողով: ՀՅԴ Բիւրոյի անդամ Կիրօ Մանոյեան Yerkirmedia.am-ի թղթակիցին հետ զրոյցին ընթացքին ըսած է, որ Հայաստանի վերջին իրադարձութիւններն ու Հայաստանի Հանրապետութեան հիմնադրման 100-ամեակը առիթ հանդիսացան նման ժողով մը գումարելու:
«ժողովը լսեց զեկոյցներ Դաշնակցութեան Հայաստանի Գերագոյն մարմնին եւ Դաշնակցութեան Բիւրոյի վարած քաղաքականութեան մասին, յատկապէս, վերջին իրադարձութիւններուն հետ կապուած, եղան քննարկումներ: Մասնակիցները արտայայտեցին իրենց առաջարկներն ու տեսակէտները: Եզրակացութիւնը այն էր, որ բնականաբար կուսակցութիւնը պիտի շարունակէ հայաստանակեդրոն իր քաղաքականութիւնը, որ անհրաժեշտ է ե՛ւ Հայաստանի Հանրապետութեան ու ժողովուրդին, ե՛ւ ընդհանրապէս սփիւռքահայութեան համար: Բոլորը վերահաստատեցին կուսակցութեան միակամութիւնը այս հարցով եւ շեշտեցին, որ շարժման յաջողութեան համար կուսակցութեան վարած քաղաքականութիւնը եղած է ճիշդ եւ ողջունելի», մանրամասնեց Մանոյեան:
Նշենք, որ ՀՅԴ-ն կազմակերպեր էր նաեւ բարեգործական ճաշկերոյթ, որուն հասոյթը պիտի տրամադրուի Ջաւախքին: Ճաշկերոյթին ընթացքին նաեւ կատարուած է հանգանակութիւն։
Անդրադառնալով վարչապետ Փաշինեանի Ջաւախք կատարած այցին, Մանոյեան նշեց, թէ չի յիշեր, որ վերջին 15 տարուան ընթացքին Հայաստանի քաղաքական ամենաուժեղ լիազօրութիւններ ունեցող անձը այցելէ Ջաւախք: Ան արձանագրեց, որ նոյնիսկ ԱԳ նախարարներ եղած են, որոնք չեն այցելած Ջաւախք: