Նախագահ Լուիս Լաքաժէ Փօուի Ներկայութեամբ Ուրուկուէյի Մէջ Ոգեկոչուեցաւ Հայոց Ցեղասպանութեան 107-ամեակը

26 ապրիլին Ուրուկուէյի խորհրդարանի նախասրահին մէջ տեղի ունեցաւ Հայոց ցեղասպանութեան 107-ամեակին նուիրուած ձեռնարկ, որուն ընթացքին ելոյթ ունեցան խորհրդարանի նախագահ, պատգամաւոր Օփէ Պասքէթ, որ` անդրադառնալով օրեր առաջ Թուրքիոյ արտաքին գործոց նախարար Չաւուշօղլուի կողմէ հայերուն ուղղուած Գորշ գայլերու նշանը ցոյց տալուն, խստօրէն դատապարտեց արարքը, Ուրուկուէյի փոխնախագահ Պէաթրիս Արխիմօ անգամ մը եւս վերահաստատեց երկրի հաւատարմութիւնը Հայ դատին նկատմամբ: Քաղաքագէտ, լրագրող Քլաուտիօ Ֆանտինի իր ելոյթին մէջ խօսեցաւ ժխտողականութեան մասին:

Հայաստանի Ազգային ժողովի փոխնախագահ, Ուրուկուէյ-Հայաստան միջխորհրդարանական բարեկամական խումբի նախագահ ՀՅԴ Գերագոյն մարմինի ներկայացուցիչ Իշխան Սաղաթէլեան տեսերիզով փոխանցեց իր խօսքը: Ան` բարձր գնահատելով Ուրուկուէյի պատմական կեցուածքը, նկատել տուաւ, որ ներկայիս երբ Հայոց ցեղասպանութեան միջազգային ճանաչումը արդէն իսկ իրողութիւն է, առանձնակի ակնածանքով կը յիշենք Ուրուկուէյի կողմէ Հայոց ցեղասպանութեան ճանաչումը 1965 թուականին, երբ Ուրուկուէյը դարձաւ աշխարհի առաջին պետութիւնը, որ արդարութեան ձայն հնչեցուց եւ սկիզբը դրաւ Հայոց ցեղասպանութեան միջազգային ճանաչման գործընթացին:

Ուրուկուէյի Հայ դատի յանձնախումբի անունով Կապրիէլա Մուժուքեան քննադատեց երկրի արտաքին գործոց նախարարութիւնը, որ նոյն օրը ընդունած էր թուրք արտաքին գործոց նախարար Չաւուշօղլուին եւ բարձր գնահատեց Ուրուկուէյի նախագահին արագ արձագանգը այս դէպքին:

Leave a Comment

You must be logged in to post a comment.