ՀՅԴ Հայաստանի Գերագոյն Ժողովի Յայտարարութիւնը

ՀՅԴ Հայաստանի կազմակերպութեան 24-րդ Գերագոյն ժողովը, քննելով Հայաստանի եւ Արցախի Հանրապետութիւններում ստեղծուած քաղաքական եւ անվտանգային իրավիճակը, գնահատելով հանրային կեանքում տիրող տրամադրութիւններն ու բարոյահոգեբանական մթնոլորտը, յետպատերազմական իրավիճակով պայմանաւորուած արտաքին եւ ներքին մարտահրաւէրներն ու սպառնալիքները, արձանագրում է.

– մեր ժողովրդի եւ պետականութեան ապագայի համար կենսական անհրաժեշտութիւն է շարունակում մնալ նախապէս յայտարարուած բոլոր միջոցներով հայրենադաւ իշխանութեան հեռացումն ու մեր երկրի կառավարման համակարգում նիկոլիզմի ի սպառ բացառումը,

– թէեւ ժողովրդական պայքարի արդիւնքում իշխանութիւնները ստիպուած էին յայտարարել արտահերթ խորհրդարանական ընտրութիւնների անցկացման մասին, սակայն ակնյայտ է, որ ընտրութիւնների անուան տակ իշխանութիւնը փորձելու է ամէն ինչ անել վերարտադրուելու համար,

– արտահերթ խորհրդարանական ընտրութիւնների հաւանական անցկացումն ունենալու է ճակատագրական նշանակութիւն մեր ազգային ինքնութեան եւ պետականութեան պահպանման համար:

Ելնելով վերոյիշեալ հաստատումներից եւ արձանագրումներից` ՀՅԴ Հայաստանի Գերագոյն ժողովը որոշեց`

Ա. արտահերթ խորհրդարանական ընտրութիւններ անցկացուելու դէպքում մասնակցել` դրանք դիտարկելով որպէս հայրենադաւ իշխանութիւններին հեռացնելու միջոցներից մէկը,

Բ. հաւանական ընտրութիւններին ՀՅԴ մասնակցութեան ձեւաչափի վերաբերեալ որոշումներ կայացնելու լիազօրութիւնը վերապահել ՀՅԴ Հայաստանի Գերագոյն մարմնին:

Հայ յեղափոխական դաշնակցութեան Հայաստանի Գերագոյն ժողովը կոչ է անում մեր հայրենակիցներին` ցանկացած զարգացման պարագայում` լինի ընտրութիւն, թէ` ոչ, շարունակել հայրենադաւ իշխանութիւններին օր առաջ հեռացնելու պայքարը` յանուն երկրի ապագայի:

18 ապրիլ 2021

Leave a Comment

You must be logged in to post a comment.