ՀՅԴ Գանատայի երիտասարդական եւ ուսանողական կառոյցները հայ ռազմագերիներու հարցով ՄԱԿ-ին ուղղուած պահանջագրի ստորագրահաւաք սկսան

Ապրիլ 24-ին, ՀՅԴ Գանատայի Երիտասարդական Միութեան (ԳԵՄ) եւ ՀՅԴ «Արմէն Գարօ» Ուսանողական Միութեան կազմակերպութեամբ, եւ Գանատայի Հայ ուսանողական միութեանց մասնակցութեամբ, առցանց պահանջագրի կայք հիմնուեցաւ, որ Միացեալ Ազգերու Կազմակերպութենէն եւ ՄԱԿ-ի գլխաւոր քարտուղար Անթոնիօ Կութերրեսէն կը պահանջէ հայ ռազմագերիներու ազատ արձակումը։

Պահանջագրին մէջ կը նշուի, որ 2020-ի նոյեմբերին Արցախի դէմ շղթայազերծուած ատրպէյճանական պատերազմին աւարտէն ի վեր, ատրպէյճանական կողմը կը հրաժարի համագործակցիլ հայկական կողմին հետ՝ ռազմագերիներու հայրենադարձութիւնը իրականացնելու համար:

Մարդու իրաւունքներու եւրոպական դատարանի Հայաստանի ներկայացուցչութեան տուեալներով, Պաքու ապօրինի կերպով կալանքի տակ կը պահէ 240 հայ ռազմագերիներ, որոնցմէ 90 տոկոսը ունին լուսանկարչական և կամ տեսանիւթերով փաստեր, զորս կը հաստատեն, որ ատրպէյճանական զինուած ուժերը գերեւարած են այդ անձերը:

Պահանջագիրը կը յիշեցնէ, որ Միջազգային մարդասիրական օրէնքը եւ զինեալ հակամարտութիւններու օրէնքը կը պահանջեն, որ հակամարտութեան կողմերը մարդասիրաբար վերաբերին ռազմագերիներուն հանդէպ եւ կատարեն անհրաժեշտ փոխանակումները: «Ռազմագերիներու նկատմամբ վերաբերմունքի գծով երրորդ պայմանագրութեան» 4-5-13-րդ յօդուածը (1949) յստակօրէն կը սահմանէ, թէ ով կը նկատուի ռազմագերի եւ նոյն պայմանագրով պաշտպանութեան ենթակայ են բոլոր այն ռազմագերիները, որոնք անմարդկային վերաբերմունքի կ՚ենթարկուին ռազմական գործողութիւններէն ետք։ Ատրպէյճանը խախտած է այս պայմանագիրը՝ հրաժարելով բացայայտել հայ ռազմագերիներու ճշգրիտ թիւը եւ մերժելով Կարմիր խաչի միջնորդութիւնը:

Պահանջագիրը կը շեշտէ, որ ապօրինի ձերբակալուած հայ զինուորներու ազատ արձակումը ապահովելու եւ իրենց ողբերգութեան առնչութեամբ միջազգային իրազեկութիւնը ապահովելու համար, նպատակադրուած է, որ պահանջագիր- միջնորդագիրը ունենայ 50,000 ստորագրութիւն՝ 24 օրուան ընթացքին:

Ստորագրահաւաքին մասնակցիլ այս յղումով

Leave a Comment

You must be logged in to post a comment.