Հայ Ժողովուրդը Կանխեց Երկրորդ Ցեղասպանութիւնը. Բակօ Սահակեան
ՍՏԵՓԱՆԱԿԵՐՏ.- Արցախի Հանրապետութեան նախագահ Բակօ Սահակեան 20 Փետրուարին շնորհաւորական ուղերձ յղեց Արցախի վերածնունդի օրուան առթով։
Ստորեւ՝ սոյն ուղերձին բնագիրը.
«Սիրելի՛ հայրենակիցներ,
Արցախի Հանրապետութեան իշխանութիւնների եւ անձամբ իմ անունից ի սրտէ շնորհաւորում եմ ձեզ Արցախի վերածննդի օրուայ առթիւ: 1988ի Փետրուարի 20ը մեր ժողովրդի համար պատմական օր էր, որը դարձաւ տասնամեակներ շարունակ կուտակուած դժգոհութիւնների ու բողոքի պոռթկումը, անարդարութեան, ճնշումների ու բռնութիւնների դէմ երկար տարիներ խմորուող պայքարի կիզակէտը: Այդպէս շարունակուել այլեւս չէր կարող: Արցախցին դուրս եկաւ հրապարակ՝ յանուն սեփական իրաւունքների պաշտպանութեան, յանուն սեփական ճակատագիրն ինքնուրոյն տնօրինելու, յանուն սեփական հողում ազատ ապրելու եւ հայ մնալու:
Յետագայ զարգացումներն ապացուցեցին, որ մեր ընտրած ուղին ճիշդ էր: Բաքուի ու Սումգայիթի հայ բնակչութեան կոտորածները վերջնականապէս ցոյց տուեցին բռնատիրական Ադրբեջանի իրական դէմքն ու նպատակները, բացայայտեցին արցախահայութեանը բնաջնջելու նրա հրէշաւոր ծրագրերը:
Հայ ժողովուրդը միաւորուեց, մէկ մարդու պէս զէնք վերցրեց եւ մեզ պարտադրուած պատերազմում պաշտպանեց իր հողն ու պատմութիւնը, իր հաւատքն ու արժանապատուութիւնը‘ կանխելով երկրորդ Ցեղասպանութիւնը եւ կերտելով փառաւոր յաղթանակներ:
Սիրելի՛ հայրենակիցներ,
Արցախի վերածնունդը համայն հայութեան ամենանշանակալի յաղթանակներից է: Դա համազգային կամքի ու ոգու, ուժի ու միասնականութեան յաղթանակն է, հայրենիքին անսահման նուիրուածութեան եւ սեփական ուժերի հանդէպ հաւատի յաղթանակը:
Մէկ անգամ եւս շնորհաւորում եմ բոլորիս այս յիշարժան տօնի կապակցութեամբ եւ մաղթում խաղաղութիւն, քաջառողջութիւն ու ամենայն բարիք:
Յաւե՜րժ փառք նրանց, ովքեր իրենց կեանքը զոհաբերեցին՝ յանուն մեր ժողովրդի նուիրական իղձերի ու նպատակների, յանուն վեհ գաղափարների իրականացման»: