«Հայաստան» դաշինքի շնորհաւորական ուղերձը՝ Ամանորի եւ Սուրբ Ծննդեան տօնի առթիւ
Սիրելի՛ հայրենակիցներ,
Ճանապարհում ենք 2021 թուականը։
Մեր պետականութեան եւ մեզանից իւրաքանչիւրի համար այն շարունակուող պարտութեան, ծանր կորուստների, երկրի ինքնիշխանութեանն ուղղուած ցաւալի մարտահրաւէրների, խորացող ներքին բաժանարարների եւ անստոյգ հեռանկարի տարի էր։
Բազմաթիւ ընտանիքներ ապրում են հարազատ որդիների ու հայրերի կորստի ցաւը, հազարաւորները՝ կիսում կորսուած հայրենի տան ու փախստականի ճակատագիրը։
Մենք միասին հնարաւորութիւն ունենք այդ անպատուաբեր ու նուաստացուցիչ ընթացքը կասեցնելու, ուղղելու մեր պետականութեան խաթարուած ողնաշարը, վերագտնելու մեր արժանապատուութիւնն ու ամրացած ոգով կանգնեցնելու պարտութիւնների կործանարար շղթան։
Մեր հաւաքական պայքարն առայժմ համեստ ձեռքբերումներով է նշանաւորուել, բայց մեր ժողովրդի պատմական իղձերը կեանքի կոչելու մեր յանձնառութիւնն աննահանջ է։
Շնորհաւորում ենք բոլորիդ Ամանորի եւ Սուրբ Ծննդեան տօների առթիւ:
Մաղթում ենք, որ իւրաքանչիւր հայի ընտանիքում թեւածի սիրոյ, խաղաղութեան, յարգանքի, հոգատարութեան ու բարեկեցութեան մթնոլորտը, որ մեր մայրերի եւ մանուկների աչքերում միայն երջանկութեան արցունքներ լինեն։
Թող 2022թ․-ը Հայոց բանակի համար լինի զօրացման ու մեր սահմանների անառիկութեան տարի։
Նոր Տարում նոր կորովով եւ ազգային միասնականութեամբ լծուենք մեր պետականութիւնը պաշտպանելու եւ ամրացնելու, մեր Հայրենիքի վերընձիւղման գործին։
Շնորհաւո՛ր Ամանոր եւ Սուրբ Ծնունդ։
«Հայաստան» դաշինք