Լոյս է տեսել ՀՅԴ պաշտօնաթերթ «Դրօշակ»-ի 2021 թուականի առաջին համարը

Համացանցի վրայ այսօրուանից կարելի է ընթերցել «Դրօշակ» թուականի առաջին համարը: «Դրօշակ»-ի Առաջնորդողը անդրադառնում է Հայաստանում, Արցախում եւ նրանց շուրջ տեղի ունեցող իրադարձութիւններին: Եզրակացութիւն է արւում, թէ ինչ փոփոխութիւններ են անհրաժեշտ, որոնք կը նպաստեն ազգի ու պետականութեան առջեւ ծառացած խիստ մտահոգիչ գործընթացների կանխմանը եւ հնարաւորութիւնների դուռ կը բացուի առկայ ճգնաժամի յաղթահարման համար:

Պաշտօնաթերթը հարցազրոյց է անցկացրել ՀՅԴ Բիւրոյի ներկայացուցիչ Յակոբ Տէր-խաչատուրեանի հետ: Բիւրոյի ներկայացուցիչը հարցազրոյցում հանգամանօրէն անդրադարձել է յագեցած եւ դրամատիկ 2020 թուականին հայութեան կեանքում տեղի ունեցած իրադարձութիւններին, ինչպէս եւ այս իրադարձութիւններին արձագանքելով ՀՅԴ Բիւրոյի եւ ողջ կուսակցութեան ծաւալած գործունէութեանը: Հարցազրոյցը պարունակում է հետաքրքրական տեղեկութիւններ մի շարք կարեւոր հիմնահարցերի մասին, լուսաբանում է կատարուածը եւ անդրադառնում է առաջիկայում իրականացուելիք ծրագրերին:

Շարունակելով առանցքային իրադարձութիւնների քննարկման շարքը «Դրօշակ»-ի էջերում Վարդան Յակոբեանը անդրադառնում է Արցախի դէմ իրականացուած վերջին պատերազմից յետոյ տարածաշրջանային նոր իրողութիւններին եւ դրանց հեռանկարին: Իր հերթին արեւելագէտ, տարածաշրջանային հարցերով փորձագէտ Արմէն Պետրոսեանը գրում է, ի դէմս Էրտողանի, այսօրուայ Թուրքիոյ որդեգրած ակրեսիւ ծաւալապաշտական քաղաքականութեան մասին` հարեւան երկրների նկատմամբ, այդ թւում Արցախեան պատերազմում վերջինիս ունեցած դերակատարութեան վերաբերեալ:

Հայաստանի հասարակական երկփեղկուածութեան մասին իր մտահոգութիւններն է շարադրել Արա Նռանեանը, տագնապ յայտնելով երկրում իշխող ուժերի ապազգային քարոզչութան ձեւաւորած անպատասխանատուութեան կրաւորական մթնոլորտի համար, ինչը այս ճակատագրական ժամանակներում լրջօրէն վտանգում է ազգի ու պետութեան ապագան:

Պատմաբաններ Արմէն Ասրեանը եւ Անի Մելքոնեանը անդրադարձել են 102 տարի առաջ յունուար ամսուն կեանքից հեռացած Հայաստանի հիմնադիր Արամ Մանուկեան մարդու, քաղաքացու եւ պետական գործչի կերպարին զուգահեռներ գծելով մեր օրերի հետ եւ ընդգծելով առաջնորդի բարոյական, քաղաքական կերպարն ու պատասխանատուութեան զգացումը: Անի Մելքոնեանը անդրադարձել է նաեւ ճիշտ նոյն օրերին կեանքից հեռացած հայութեան մէկ այլ մեծագոյն գործչի, Դաշնակցութեան Բիւրոյի անդամ Ռոստոմի կերպարին, ում թէ կեանքը եւ թէ մահը պատմական նշանակութիւն ունեցան հայութեան ճակատագրի համար:

«Դրօշակ»-ի ներկայ համարում տեղ է գտել նաեւ «Ալիք» օրաթերթի խմբագիր Դերենիկ Մելիքեանի «ՀՅ Դաշնակցութիւնը եւ Պարսկաստանի Սահմանադրական շարժումը» ուշագրաւ յօդուածի 2-րդ եւ վերջին մասը: Յենուելով տարբեր աղբիւրների վրայ Դ. Մելիքեանը բազմակողմանիօրէն քննութեան է ենթարկում անցած դարասկզբին Պարսկաստանում տեղի ունեցած Սահմանադրական յեղափոխութեան եւ նրանում Դաշնակցութեան ունեցած դերակատարութեան հարցը: Վեր են հանւում այն պատճառները, որոնք թելադրեցին հայ ազգային-քաղաքական առաջնորդող ուժին գործակցելու եւ վճռորոշ դերակատարութիւն ստանձնելու հարեւան երկրում ծաւալուած ժողովրդավարական յեղափոխութեան մէջ եւ ի յայտ եկած այն առարկայական պատճառներին, որոնք ստիպեցին հայկական կողմից զատուելու հեռանալ այս դատապարտուած շարժումից:

ՀՅԴ Բիւրոյի պաշտօնաթերթի նոր տարուայ մեկնարկային համարը ընթերցողին կ’առաջարկէ այլ հետաքրքրական նիւթեր եւս:

«Դրօշակ»-ի 2021թ թիւ 1 համարը համացանցում կարող էք գտնել droshak.am հասցէի ներքոյ:

Ներբեռնել համարը դրօշակ թիւ 1 , յունուար – 2021

Leave a Comment

You must be logged in to post a comment.