Գանատայի Հայ Դատի յանձնախումբը Արցախի հարցը քննարկեց խորհրդարանի անդամ Կարնէթ Ճէնըսի Հետ

Նախորդ շաբթուան ընթացքին, Հայ Դատի Շրջանային Յանձնախումբի հերթական հանդիպումներու շարքին, Հայ Դատի Օթթաուայի Գրասենեակի գործավար Սեւակ Պէլեան խորհրդակցական հանդիպում մը ունեցաւ Շէրուուտ Փարք – Ֆորդ Սասքադչուան ընտրատարածքը ներկայացնող Պահպանողական երեսփոխան՝ Կարնէթ Ճէնըսի հետ:

Մօտաւորապէս մէկ ժամ տեւած հանդիպման ընթացքին, Հայ Դատի ներկայացուցիչը երեսփոխան Ճէնըսի հետ քննարկէց Հայ Դատի առնչուող առաջնահերթ շարք մը հարցեր, որոնց շարքին Թուրքիոյ ժխտողական քաղաքականութեան հակադարձելու անհրաժեշտութիւնը, Արցախի հիմնահարցը, Գանատա-Հայաստան երկկողմանի յարաբերութիւններու զարգացման հոլովոյթը, ինչպէս նաեւ Գանատա-Հայաստան Խորհրդարանական Խմբակցութեան աշխատանքները: Յատուկ շեշտ դրուեցաւ Գանատայի մէջ թրքական գործօնի ժխտական ազդեցութեան չեզոքացման աշխատանքներուն եւ Արցախեան հիմնահարցի խաղաղ կարգաւորման եւ անոր նկատմամբ Գանատայի դրական կեցուածքը ապահովելու անհրաժեշտութեան վրայ:

Իր կարգին, Երեսփոխան Ճէնըս Հայ Դատի ներկայացուցիչին հետ բաժնեց իր կարծիքն ու դրական կեցուածքը վերոնշեալ հարցերուն շուրջ եւ իր գնահատանքը արձանագրելէ ետք յանձնախումբի տարած գործունէութեան մասին, իր աջակցութիւնը յայտնեց Հայ Դատի աշխատանքներուն:

Leave a Comment

You must be logged in to post a comment.