Արցախի Խորհրդարանի Նախագահը Տեսակցեցաւ Համազգայինի Կեդրոնական Վարչութեան Ատենապետ Զաքար Քէշիշեանի Հետ

1 սեպտեմբերին Արցախի խորհրդարանի նախագահ Արթուր Թովմասեան, ՀՅԴ Արցախի Կեդրոնական կոմիտէի ներկայացուցիչ Արթուր Մոսիեանի ընկերակցութեամբ, ընդունեց Համազգային հայ կրթական եւ մշակութային միութեան Կեդրոնական վարչութեան ատենապետ եւ Շուշիի «Վարանդա» երգչախումբի հիմնադիր-գեղարուեստական ղեկավար Զաքար Քէշիշեանը:

Թովմասեան ողջունեց Քէշիշեանը` պատասխանատու պաշտօնին վրայ ընտրուելուն առիթով, ընդգծելով, որ Շուշիի «Վարանդա» երգչախումբին օրինակը սփիւռքի կողմէ Արցախի մէջ իրագործած աշխատանքներէն լաւագոյններու շարքին է:

Հանդիպման ընթացքին Թովմասեան բաժնեկցեցաւ վերջերս Լիբանան եւ Կիպրոս կատարած այցելութիւններէն ստացած տպաւորութիւններով:

Քէշիշեան շնորհակալութիւն յայտնեց ընդունելութեան համար եւ նշեց, որ Արցախ կը գտնուին Շուշիի «Վարանդա» մանկապատանեկան եւ երիտասարդական պետական երգչախումբին 30-ամեակը նշելու նպատակով: Այդ առիթով Ստեփանակերտի մէջ երգչախումբը համերգաշարեր պիտի տայ:

Հանդիպումին Մոսիեան անդրադարձաւ սփիւռքի ներուժի ներգրաւումով Արցախի մէջ մշակութային կեանքի աշխուժացման վերաբերող աշխատանքներուն:

Leave a Comment

You must be logged in to post a comment.