ՀՅԴ Հայաստանի Գերագոյն մարմինի յայտարարութիւնը Հայաստանի Հանրապետութեան Անկախութեան օրուան առթիւ

Սիրելի՛ հայրենակիցներ,

1991 թուականի սեպտեմբերի 21-ին հայ ժողովուրդը վերահաստատեց ազատ ու անկախ ապրելու իր կամքը՝ հիմք ունենալով մեր նորօրեայ պետականութեան ծննդեան վկայականը՝ Անկախութեան Հռչակագիրը։

Դարեր շարունակ մեր ժողովրդի կրած զրկանքներն ու զոհաբերութիւնները մեզ հանգեցրել են հստակ ճշմարտութեան․ անկախ պետականութիւնը մեզ համար ինքնանպատակ չէ։ Այն միակ եւ անփոխարինելի միջոցն է՝ պահպանելու մեր ազգային ինքնութիւնը եւ ապահովելու հայ ժողովրդի հարատեւութիւնը։

Մեր նահատակների թափած արիւնն ու սերունդների կրած զրկանքներն էութեամբ, ոգով եւ բովանդակութեամբ ՀԱՅԿԱԿԱՆ պետութիւն ունենալու համար էին։

Պետութիւն, որը չի հրաժարվում իր պատմութիւնից, իր արմատներից եւ համազգային իղձերից, այլ դառնում է համայն հայութեան անվտանգութեան, արժանապատվութեան եւ ստեղծարար ներուժի պաշտպանն ու ջատագովը։

Այսօր, երբ կանգնած ենք մեր ինքնութեան խաթարման եւ պետականութեան թուլացման ճակատագրական վտանգների առջեւ, Հայ Յեղափոխական Դաշնակցութիւնը վերահաստատում է իր անխախտ դիրքորոշումը՝

– Պաշտպանե՛լ մեր ինքնութիւնն ու արժէքները,
– Պայքարե՛լ յանուն իրապէս ինքնիշխան, ազգային արժէքների վրայ խարսխուած եւ անվտանգ Հայաստանի,
– Վերականգնե՛լ համազգային միասնականութիւնն ու համախոհութիւնը՝ ի պաշտպանութիւն մեր պետականութեան եւ հաւաքական իրաւունքների։

Մեր պայքարը շարունակվում է։ Հայկական պետութիւնը պիտի ապրի՛ եւ հարատեւի՛ իր բուն էութեամբ ու առաքելութեամբ։

Կեցցե՛ անկախ Հայաստանի Հանրապետութիւնը եւ աշխարհասփիւռ հայ ժողովուրդը։

Խոնարհո՛ւմ մեր բոլոր նահատակների անմար յիշատակին։

ՀՅԴ Հայաստանի Գերագոյն մարմին
21 սեպտեմբերի, 2026 թ․, Երեւան