Ատրպէյճանի տարածքով Հայաստան հասած են հացահատիկի եւ պարարտանիւթի նոր խմբաքանակներ

Ռուսաստանէն Հայաստան Ատրպէյճանի տարածքով իրականացուող տարանցիկ բեռնափոխադրումները կը շարունակուին։ Ըստ APA լրատու գործակալութեան, մայիս 29-ին Հայաստան ուղարկուած են հացահատիկով բեռնաւորուած չորս վակոն՝ ընդհանուր 280 թոն ծաւալով, ինչպէս նաեւ 277 թոն պարարտանիւթ փոխադրող եւս չորս վակոն։

Հաղորդուած տուեալներուն համաձայն, մինչեւ այժմ Ռուսաստանէն Հայաստան տարանցիկ ճանապարհով տեղափոխուած է աւելի քան 28 հազար թոն հացահատիկ, 4 հազար թոնէ աւելի պարարտանիւթ, 133 թոն ալիւմինիում եւ 68 թոն հնդկացորեն։

Տարանցիկ բեռնափոխադրումներէն զատ, Ատրպէյճան նաեւ նաւթամթերք կ՚արտահանէ Հայաստան։ Մինչեւ օրս Հայաստան արտահանուած է աւելի քան 10 հազար թոն տիզելային վառելիք, 979 թոն AI-92 եւ 2,955 թոն AI-95 տեսակի պենզին։