Բագրատ արքեպիսկոպոս Գալստանեանի կոչը
«Սրբազան պայքար»ի առաջնորդ Բագրատ սրբազանը հանդէս եկաւ յայտարարութեամբ` անդրադառնալով Պաքուի բանտերուն մէջ գտնուող Արցախի ռազմաքաղաքական ղեկավարութեան եւ միւս հայ գերիներուն՝ հաստատելով, որ իրենք պիտի շարունակեն անոնց դատը հետապնդել։ Ստորեւ՝ կոչը։
Պաքւում ընթանում են մեր գերեվարուած հայրենակիցների «դատավարութիւնները», առաջիկայում մեկնարկելու են Արցախի պատանդառուած ռազմաքաղաքական ղեկավարութեան եւ մեր միւս գերեվարուած հայրենակիցների «դատավարութիւնները»:
Այսու մեր զօրակցութիւնն ենք յայտնում Արցախի պատանդառուած ռազմաքաղաքական ղեկավարութեանը եւ միւս գերեվարուած մեր հայրենակիցներին այս վճռական ժամին՝ հասկանալով հանդերձ, որ Պաքւում բռնութեամբ կորզուած որեւէ այսպէս կոչուած «ցուցմունք» չի կարող հիմք հանդիսանալ մեր կարծիքի փոփոխութեան եւ մեր գործողութիւնների վերանայման համար: Մենք շատ լաւ պատկերացնում ենք, թէ ինչպիսի՛ պայմաններում են կորզուել բոլոր հնարաւոր «ցուցմունքները» եւ թէ ինչ ճնշման տակ են գտնուել ու շարունակում մնալ մեր բոլոր պատանդները:
Մենք միասնական ենք Պաքուի պատանդառած մեր հայրենակիցներին աջակցութեան հարցում՝ վստահեցնելով, որ մենք նրանց կողքին ենք, եւ որ Պաքուի որեւէ ճնշում չի կարող սասանել ո՛չ մեր աջակցութիւնը, եւ ո՛չ էլ Հայաստանի ու հայ ժողովրդի կամքը՝ սեփական պետութեանը եւ սեփական քաղաքացիներին տէր կանգնելու եւ վերջիններիս Հայրենիք վերադարձնելու համար:
Կոչ եմ անում Հայաստանեան եւ սփիւռքեան լայն հանրութեանը, տարբեր հանրային-քաղաքական կառոյցներին եւ անհատներին, ձեր անվերապահ աջակցութիւնը յայտնել մեր պատանդառուած հայրենակիցներին, ինչպես նաեւ ի մի բերելու իրենց տեղեկատուական եւ կազմակերպչական բոլոր միջոցները՝ այս հարցում միասնութիւն եւ արդիւնաւէտ ընթացք ապահովելու համար։
Ձեզ հետ ենք, սիրելի եղբայրներ…
Բագրատ արքեպիսկոպոս Գալստանեան
09 Յունուարի, 2025թ.
Comments are closed.