Շուշիի Մէջ Ոչնչացուած Են Հրասայլ–Յուշարձանի Տարածքին Գտնուող Խաչքարերը
րցախի մշակութային ժառանգութեան պաշտպան monumentwatch.org կայքը կը գրէ.
«2023 սեպտեմբերին Արցախի ամբողջական բռնագրաւումէն ետք, ազրպէյճանական կողմը առաջին հերթին ցուցադրաբար կազմաքանդեց Շուշի քաղաքին մօտ գտնուող յայտնի հրասայլ-յուշարձանը:
Յիշեցնենք, որ հրասայլը Արցախի ազատագրական պայքարի խորհրդանիշն էր, յաղթանակի խորհրդանիշը, որուն քով յարգանքի տուրք կը մատուցուէր Շուշիի ազատագրական պայքարի համար նահատակուած հերոսներու յիշատակին:
Իսկ վերջերս ազրպէյճանցի կայքագրող Քեամրան Ռազմովար հրապարակած է տեսանիւթ մը, որուն մէջ կ՛երեւի, որ ազրպէյճանական կողմը ոչնչացուցած է նաեւ հրասայլ-յուշարձանին մօտ տեղադրուած խաչքարերը, զոհուած ազատամարտիկներու անունները յաւերժացնող յուշատախտակները: Մասնաւորապէս փշրուած է 44-օրեայ պատերազմին Քարինտակի մէջ զոհուած Յակոբ Յարութիւնեանի յիշատակին տեղադրուած խաչքարը, ինչպէս նաեւ` այդ տարածքին գտնուող միւս խաչքարերը:
Ազրպէյճանի համակարգուած արշաւը այս ուղղութեամբ յատկապէս կ՛ընդգծուի քանի մը նշանակալից խաչքարերու ոչնչացումով, ներառեալ` տակաւին 2020-ին ոչնչացուած Հադրութի շրջանի Առաքել գիւղի խաչքարը, քաղաքի ազատամարտիկներու յուշահամալիրի խաչքարերը, Բերձորի պատմական գերեզմանատան 14-րդ դարու եզակի խաչքարը, ինչպէս նաեւ 15-16-րդ դարերու վերագրուող շարք մը այլ խաչքարեր: Ասկէ բացի` ոչնչացուած են նաեւ Շուշիի հայ-յունական հին գերեզմանատան 12-13-րդ դարերու եզակի խաչքարերը»:
Comments are closed.