ՀՀ Անկախութեան 25ամեակին Նուիրուած Ընդունելութիւն Լոս Անջելեսում

Լոս Անջելեսում ՀՀ գլխաւոր հիւպատոսութեան կողմից կազմակերպուած՝ Հայաստանի անկախութեան 25ամեայ տարեդարձին նուիրուած միջոցառումների շարքը եզրափակուել է տօնական ընդունելութեամբ, որը տեղի է ունեցել «Բեվերլի Հիլթըն» հիւրանոցի հանդիսասրահում: Տօնին մասնակցել են ամերիկեան դաշնային եւ տեղական իշխանութիւնների ներկայացուցիչներ, համայնքային կառոյցների ղեկավարներ, հասարակական, քաղաքական, մշակութային գործիչներ:

Ներկաներին ուղղուած իր ողջոյնի խօսքում՝ ՀՀ գլխաւոր հիւպատոս Սերգէյ Սարկիսովը եւս մէկ անգամ շնորհաւորել է բոլորին այս կարեւոր տօնի կապակցութեամբ՝ բարգաւաճում եւ նորանոր յաջողութիւններ մաղթելով Հայաստանին եւ Արցախին:

Միջոցառման մասնակիցներին ուղերձ էր յղել ՀՀ վարչապետ Կարէն Կարապետեանը, ով շնորհաւորել է ամերիկահայերին ՀՀ անկախութեան 25ամեակի կապակցութեամբ եւ շնորհակալութիւն յայտնել ամերիկահայ համայնքի բոլոր կազմակերպութիւններին, կառոյցներին եւ միութիւններին՝ անկախութեան 25 տարիների ընթացքում Հայաստանին ցուցաբերած օժանդակութեան համար:

Տօնական երեկոյին մասնակցել են ԱՄՆ կոնգրեսական Ադամ Շիֆը, Լոս Անջելեսի քաղաքային խորհրդի անդամներ Փոլ Կրիկորեանը, Փոլ Կորտեզը, Սեբաստիան Ռիդլի-Թոմասը, Գլենդելի ոստիկանապետ Ռոբերտ Կաստրօն, Լոս Անջելեսում հաւատարմագրուած երկրների գլխաւոր հիւպատոսներ, ԱՄՆ պետքարտուղարութեան Լոս Անջելեսի գրասենեակի տնօրէն æէյմս Փարաւոնեանը, Մոնթեբելլոյի քաղաքապետ æէք Հաջինեանը, Կալիֆորնիայի նահանգային խորհրդարանի անդամ Խաչօ Աչաջեանը եւ այլք:

Իր շնորհաւորական խօսքում ԱՄՆ կոնգրեսական Ադամ Շիֆը նշել է, որ իրենց, նաեւ Սփիւռքի համար առաջնային պէտք է լինի Հայաստանի տնտեսական զարգացումը, Արցախի անվտանգութեան ապահովումը եւ Թուրքիայի հակահայ քաղաքականութեան հակադարձումը:

Երեկոյի մշակութային հատուածում կատարումներով հանդէս են եկել «Բելֆրի» սիմֆոնիկ նուագախումբն ու «Գէորգեաններ» պարային համոյթը: