ՀՕՄ-ի Ախուրեանի Մօր Եւ Մանկան Առողջութեան Կեդրոն Այցելեց Ալֆորվիլի Քաղաքապետը
ՀՕՄ-ի Կեդրոնական վարչութեան անդամ Զոյա Քոչարեան եւ ՀՕՄ-ի Հայաստանի Շրջանային վարչութեան ատենապետ Մարօ Քէշիշեան ՀՕՄ-ի Ախուրեանի Մօր եւ մանկան առողջութեան կեդրոնին մէջ դիմաւորեցին վերջերս աշխատանքային այցելութեամբ Հայաստան գտնուող Ալֆորվիլի (Ֆրանսա) քաղաքապետ Լիւք Քարուունասի գլխաւորած պատուիրակութիւնը:
Պատուիրակութեան մաս կը կազմէին` Ալֆորվիլի փոխքաղաքապետ Կարօ Խաչիկեանը, Քաղաքապետական խորհուրդի անդամ եւ Ֆրանսայի Կապոյտ խաչի վաստակաշատ անդամ Մարօ Գապայեանը, Ալֆորվիլի նախկին փոխքաղաքապետներ, Ալֆորվիլի Ս. Պօղոս Պետրոս եկեղեցւոյ հոգաբարձուներու խորհուրդի անդամներ, ֆրանսական Լոյս կազմակերպութեան ներկայացուցիչն ու Ալֆորվիլի «Այբ» Էֆ.Էմ. ձայնասփիւռի թղթակից Յարութ Մարտիրոսեանը: ՀՕՄ-ի անդամները հիւրերուն ներկայացուցին ՀՕՄ-ի հակիրճ պատմութիւնը, առաքելութիւնն ու հայաստանեան գործունէութիւնը, որոնց ցայտուն օրինակն էր ՀՕՄ-ի Ախուրեանի Մօր եւ մանկան առողջութեան կեդրոնը: ՀՕՄ-ի ներկայացուցիչները պատասխանեցին հիւրերը յուզող հարցերուն: Ապա հիւրերը, կեդրոնի փոխտնօրէն Վահրամ Միրզոյեանի ընկերակցութեամբ, շրջեցան կեդրոնի բաժանմունքներուն մէջ եւ հետաքրքրուեցան անոնց կարիքներուն եւ աշխատանքներուն ընթացքին մասին: Անոնք մեծապէս գնահատեցին ՀՕՄ-ի գլխաւորած կարեւոր այս կեդրոնին մէջ տարուող մարդասիրական եւ բարեգործական աշխատանքները: Շուրջ մէկ ժամ տեւած այցելութենէն ետք հիւրերը մեծ գոհունակութեամբ հրաժեշտ տուին` յաջողութիւն մաղթելով առողջապահական կարեւոր այս կեդրոնին եւ ՀՕՄ-ի աշխատանքներուն:
Comments are closed.