Խստագոյնս Դատապարտելի Է Հայաստանի Իշխանութիւններուն Կողմէ Արցախցիներուն Նկատմամբ Ատելութեան Խօսքը. Թաթոյեան Եւ Ստեփանեան
Հայաստանի մարդու իրաւունքներու նախկին պաշտպան Արման Թաթոյեան եւ Արցախի մարդու իրաւունքներու պաշտպան Գեղամ Ստեփանեան հանդէս եկան միացեալ յայտարարութեամբ մը` դատապարտելով Հայաստանի իշխանաւորներուն կողմէ արցախցիներուն նկատմամբ դրսեւորուած ատելութեան խօսքը: Ստորեւ` յայտարարութիւնը.
«Խստագոյնս դատապարտելի է Հայաստանի իշխանութիւնների կողմից արցախցիների նկատմամբ ուղղորդուած ատելութեան խօսքը, ինչն արտայայտուեց նաեւ յունիսի 12-ին Ազգային ժողովում Հայաստանի վարչապետի յայտարարութիւններում: Դրանից յետոյ ընկերային լրատուական տարբեր հարթակներում աւելի են սաստկացել արցախցիների նկատմամբ վիրաւորանքներն ու ատելութեան խօսքը, նրանց ծաղրելու դրսեւորումները:
«Ցեղային զտումների զոհ դարձած Արցախի ժողովրդին ամէն ինչում մեղադրելու, ամէն հարցում թիրախաւորելու այս արատաւոր երեւոյթը դառնում է հանրութեան մէջ արցախցիների նկատմամբ ատելութեան ընդհանրացման եւ լայն տարածման պատճառ:
«Բազմաթիւ են օրինակները, երբ այդ արշաւը տարածում ու անգամ ուղղորդում է Հայաստանի հանրային հեռուստաընկերութիւնը, որը բռնի տեղահանուած արցախցիների` հայաստանեան հասարակութեանն համարկման ու հանրային համերաշխութեանը նպաստելու փոխարէն մասնակից է դառնում հայութեան մի հատուածի նկատմամբ տարուող ատելութեան ընդհանրացաման: Հանրային հեռուստաընկերութեան` որպէս կառավարութեան հիմնադրած ընկերութեան, նման քաղաքականութիւնը ակնյայտ է դարձնում, որ սա իշխանութիւնների մտադրուած քաղաքականութիւն է:
«Նշուածից բացի, բազմաթիւ վկայութիւններ փաստում են, որ հաւաքների վայրերից բերման ենթարկուած արցախցիների նկատմամբ ոստիկանութեան ներկայացուցիչները դրսեւորում են առանձնակի թիրախաւորում, որն ուղեկցւում է արժանապատուութիւնը նուաստացնող արտայայտութիւններով, իրաւապահ մարմինների ներկայացուցիչների կողմից Արցախի կորստի մէջ արցախցիներին մեղադրելու, Հայաստանում «տեղ չունենալու», «հիւր լինելու» եւ այլ վիրաւորական արտայայտութիւններով:
«Արցախի համայնքների ղեկավարների, մասնաւորապէս Ստեփանակերտի, Մարտակերտի, Ասկերանի, Հաթերքի համայնքապետերի նկատմամբ յարուցուած քրէական հետապնդումները, նրանց ձերբակալումներն ուղեկցւում են ակնյայտ քաղաքական հովանաւորչութեամբ. դրանք նաեւ որեւէ իրաւական հիմք չունեն:
«Հայաստանի իշխանութիւնները չունեն Արցախի պետութեան նկատմամբ Արցախի համայնքային կամ պետական պաշտօնեաների պարտաւորութիւնների, նրանց արարքների քննութեան որեւէ իրաւասութիւն: Հայաստանի իշխանութիւններն իրենք են հրաժարուել Արցախի հետ իրաւական, ինչպէս նաեւ քաղաքական ու անգամ բարոյական բոլոր առնչութիւններից:
«Վերոնշեալ համայնքապետերի դէմ հետապնդումները սկսուեցին եւ նրանք զրկուեցին ազատութիւնից Հայաստանում իրենց քաղաքացիական, այդ թւում` հաւաքների մասնակցութեան կամ այդ հաւաքներին աջակցութիւն յայտնելու համար»:
Comments are closed.