խաչապատկերներով մեծ սեպագիր յայտնաբերուած է Սասնոյ Մարաթուկ Լերան վրայ

\n

\n

Թուրքիոյ Պաթման նահանգի Սասնոյ շրջանի Մարաթուկ լերան վրայ գտնուող հայկական Սուրբ Մարիամ Աստուածածին եկեղեցւոյ աւերակներէն հնամեայ պատմական գիրք մը եւ շարք մը այլ արժէքաւոր գտածոներ յայտնաբերուած են. այս մասին տեղեկացուցած է Սասունի հայերու միութեան նախագահ Ազիզ Տաղճը:

\n

Ըստ թրքական «Մայնեթ» կայքին՝ եկեղեցւոյ վերանորոգման աշխատանքներուն սկսելու համար, կազմակերպուած էր մաքրութեան եւ աւերակ կտորներու հաւաքման արշաւ, որուն մասնակցած են նաեւ Պաթմանի թանգարանի մասնագէտները:

\n

«Աւերակներուն միջէն գտած ենք խաչապատկերով սեպագիր, ձիու սմբակի նալեր եւ հայերէն գրութեամբ մեծ գիրք մը», կայքին տեղեկացուցած է Տաղճը՝ նշելով, որ գտածոներուն մասին անմիջապէս տեղեկացուցած են տեղւոյն ոստիկանութեան եւ զանոնք յանձնած են Պաթմանի թանգարանին:

\n

«Մեր նպատակն է 2 տարի առաջ փլուզուած այս եկեղեցին վերականգնել եւ վերանորոգել: Կ՛ենթադրենք, որ 2973 մեթր բարձրութիւն ունեցող Մարաթուկ լերան գագաթին գտնուող այս եկեղեցւոյ մէջ յայտնաբերուած գտածոները շուրջ 2000 տարուան պատմութիւն ունին: Նաեւ դիմած ենք Պաթմանի նահանգապետարան՝ դէպի եկեղեցի տանող առանձին ճամբայ մը բանալու փափաքով», եզրափակած է Սասունի հայերու միութեան նախագահը:

\n