Մարմնամարզանքի Քեպէգի ապագայ աստղը՝ Ռաֆֆի Երեմեան

Ապրիլ 27-ին, Մոնթրէալի CENTRE MULTISPORTIF DE ROSMERE մարզասրահին մէջ տեղի ունէցաւ Քեպէգ նահանգի 8-11 տարեկան մարմնամարզութեան (gymnastics) հետեւող մարզիկներու մրցաշարքը: Տասը տարեկան տղոց դասակարգին մէջ կը մասնակցէր Լաւալի LAVAL EXELLANCE մարմնամարզութեան խումբի մարզիկ Ռաֆֆի Երեմեանը, Յակոբ Երեմեանի եւ Թանիա Չիչէքեանի զաւակը: Այս դասակարգի խումբը կը բաղկանար 80 մարզիկներէ, որոնք մասնակցեցան 6 տարբեր մարմնամարզանքներու (high bar, rings, pommel horse, floor exercises, valting,  parallel bars): Ռաֆֆի Երէմեան արժանացաւ 4 ոսկի եւ 2 արծաթ մետալներու: Ան ստացաւ նաեւ այն յատուկ ոսկի մետալը, որ կը տրուի 6 մարմնամարզանքներու ամէնէն բարձր ընդհանուր միջինը ունեցող մարզիկին:

Ռաֆֆին նման յաջողութիւններու արժանացած է նաեւ 2014-ի Յունուար եւ Ապրիլ ամիսներուն Քեպէգ նահանգին մէջ կայացած երկու այլ մրցաշարքերու ընթացքին: Ռաֆֆի Երեմեան սկսած է մարմնամարզութեան  հետեւիլ 2011-ին երբ եօթ ու կէս տարեկան էր եւ յաճախ մասնակցած է տարբեր մրցաշարքերու: