Շիրակի մարզում արտագաղթը համակարգային ձախողման հետեւանք է, որի ամբողջ պատասխանատուութիւնը կրում է գործող իշխանութիւնը. Մհեր Մելքոնեան

ԱԺ  «Հայաստան» խմբակցութեան պատգամաւոր, ՀՅԴ Շիրակի Մարզային կոմիտէի ներկայացուցիչ Մհեր Մելքոնեանը գրում է.

«Շիրակի մարզում արտագաղթն այլեւս հնարաւոր չէ ներկայացնել որպէս սոցիալական դժուարութիւնների հետեւանք կամ ժամանակաւոր երեւո՚յթ։ Այն դարձել է կառավարման համակարգային ձախողման եւ սխալ տնտեսական քաղաքականութեան ուղիղ արդիւնք։ Երբ չկայ աշխատանք, երբ եկամուտը անկայուն կամ գոյութիւն չունի, երբ կեանքի որակը տարեցտարի վատթարանում է, արտագաղթը վերածւում է անխուսափելի որոշման։

Պետութիւնը տարիներ շարունակ չի կարողացել ձեւաւորել Շիրակի զարգացման յստակ տնտեսական մոդել։ Արդիւնաբերական ներուժը չի վերագործարկուել, արտադրական ենթակառուցուածքները չեն զարգացուել, ներդրումային ծրագրերը կամ չեն հասել մարզին, կամ մնացել են թղթի վրայ։ Հետեւանքը կանխատեսելի է՝ փակ ձեռնարկութիւններ, դատարկուող համայնքներ, երիտասարդութեան արտահոսք։

Արդիւնքում՝ մարզը կորցնում է իր ամենաթանկ ռեսուրսը՝ մարդուն։ Սա արդէն պարզապէս մարզային խնդիր չէ։ Սա պետական կառավարման համակարգային ձախողում է:

Շիրակի դատարկումը ունի նաեւ պետական անվտանգութեան յստակ բաղադրիչ։ Դատարկուող մարզը թուլացնում է երկրի սոցիալ-տնտեսական հենքը, խորացնում է տարածաշրջանային անհավասարութիւնը եւ երկարաժամկէտ հարուած է հասցնում պետական կայունութեանը։

Այս իրականութիւնն այլեւս չի կարելի քողարկել ձեւակերպումներով կամ արդարացնել ժամանակաւոր դժուարութիւններով։ Շիրակի մարզում արտագաղթը համակարգային ձախողման հետեւանք է, որի ամբողջ պատասխանատուութիւնը կրում է գործող իշխանութիւնը։ Երբ պետութիւնը տարիներ շարունակ չի ստեղծում աշխատանք, չի ապահովում եկամուտ եւ չի բարձրացնում կեանքի որակը, ապա ինքն է քաղաքացիներին մղում լքելու Հայրենիքը:

Այս պայմաններում լռելը յանցաւոր է, իսկ ձեւական ծրագրերով զբաղուելը՝ անպատասխանատու։

Քաղաքական յստակ պահանջն է․ Շիրակի մարզի համար անյապաղ ներկայացնել եւ իրականացնել տնտեսական զարգացման առարկայական ծրագիր՝ արդիւնաբերութեան վերագործարկմամբ, կայուն աշխատատեղերի ստեղծմամբ եւ ներդրումների նպատակային ներգրաւմամբ։ Առանց սրա՝ ցանկացած խօսք արտագաղթը կանխելու մասին պարզապէս կեղծ է»։