«Մեր ուժը սպառած չէ». Քրիստինէ Վարդանեանի կոչը հայ երիտասարդութեան

«Հայաստան» դաշինքի հանդիսաւոր հաւաքի ընթացքին, ՀՅԴ Հայաստանի Գերագոյն Մարմնի անդամ եւ Ազգային Ժողովի պատգամաւոր Քրիստինէ Վարդանեան հանդէս եկաւ յուզիչ պատգամով՝ ուղղուած հայ երիտասարդութեան: Իր ելոյթին մէջ ան շեշտեց, որ քաղաքականութեան մէջ գտնուելու իր հիմնական շարժառիթը հայրենի տունը պահպանելն է, քանի որ առանց ապահով տան կարելի չէ հանգիստ կեանք ունենալ:

Վարդանեան անդրադարձաւ հայ երիտասարդութեան առջեւ ծառացած մարտահրաւէրներուն, ինչպիսիք են յուսահատութիւնը, թմրամոլութիւնն ու խաղամոլութիւնը: Ան ներկայացուց դաշինքի կարեւորագոյն յանձնառութիւններէն մէկը, այն է՝ Հայաստանի մէջ բարձրագոյն կրթութիւնը ամբողջութեամբ անվճար դարձնելը: Ըստ պատգամաւորին, ասիկա պարզապէս նախընտրական խոստում չէ, այլ ապագայի հիմնաքար, որպէսզի նոր սերունդը ոչ թէ կործանարար սովորութիւններով զբաղի, այլ իր տեղը գտնէ գիտութեան եւ գործարարութեան աշխարհին մէջ:

Ելոյթի ընթացքին պատգամաւորը նաեւ ընդգծեց, որ յառաջիկայ ընտրութիւնները ոչ թէ անուններու կամ կուսակցութիւններու միջեւ են, այլ արժէքներու եւ պետութեան զարգացման ուղիի: Ան կոչ ուղղեց չսպասել օտար մայրաքաղաքներու որոշումներուն, այլ սեփական ուժերով կերտել երկրի յաջողութիւնը:

Վարդանեան շեշտեց, որ այս ընտրութիւնը նաեւ պարտաւորութիւն է յանուն նահատակուած հերոսներու եւ տեղահանուած արցախահայութեան իրաւունքներու պաշտպանութեան: Եզրափակելով իր խօսքը՝ ան վստահութիւն յայտնեց, որ հաւաքական ուժով հնարաւոր է բեկել պատմութեան ընթացքը եւ միասին անցնիլ դէպի երազանքներու Հայաստան տանող պատուաբեր ճանապարհը: