Դեկտեմբեր 05, 2025
Մայր Աթոռ. «Հայրենի երկրում արդարադատութիւնը կամայական որոշումներով ծառայեցւում է քաղաքական քինախնդրութեանը»
- (0)
Դատարանի կողմից Հայ Առաքելական Եկեղեցու Շիրակի թեմի առաջնորդ, քաղբանտարկեալ Միքայէլ արքեպիսկոպոս Աջապահեանին մեղաւոր ճանաչելու առիթով, Մայր Աթոռ Սուրբ Էջմիածինը յայտարարութիւն է տարածել:
Յայտարարութեան մէջ մասնաւորապէս նշուած է.
«Տ․ Միքայէլ արքեպիսկոպոս Աջապահեանին ակնյայտ շինծու մեղադրանքներով մեղաւոր ճանաչելու դատարանի որոշումը լրջագոյն հարուած հասցրեց Հայաստանում արդարադատութեանը եւ արդարադատութեան մարմինների հեղինակութեանը:
Երկրում շարունակ սերմանուող ատելութեան եւ բռնաճնշումների պայմաններում կայացուած ամօթալի այս դատական ակտը հերթական անգամ հաստատեց, որ ՀՀ-ում դատաիրաւական համակարգն ամբողջութեամբ կախուածութեան մէջ է քաղաքական իշխանութեան կամքից։
Ցաւալի է արձանագրել, որ հայրենի մեր երկրում արդարադատութիւնն ընտրողական է եւ կամայական որոշումներով անթաքոյց ծառայեցւում է քաղաքական քինախնդրութեանը։
Մայր Աթոռ Սուրբ Էջմիածինը խստօրէն դատապարտում է ապօրինի այս գործընթացը եւ օրէնքով սահմանուած բոլոր հնարաւորութիւններն օգտագործելու է՝ հասնելու Միքայէլ արքեպիսկոպոսի հանդէպ արդարութեան վերականգնմանը:
Աղօթում ենք, որ Տէրը զօրացնի, ամուր ու անկոտրում պահի Միքայէլ եւ Բագրատ արքեպիսկոպոսներին, ազգային մեծանուն բարերար տիար Սամուէլ Կարապետեանին եւ ազատութիւնից ապօրինաբար զրկուած բոլոր անձանց։ «Արդար է Տէրը, արդարութիւն է սիրում, ճշմարտութեանն է նայում երեսը Նրա» (Սաղմ.10․8)»:
