ՀՅԴ 12-րդ Համահայկական Բանակում. Մեզ Միացնողը Դաշնակցութիւնն Է

Անցնող շաբաթներուն առիթը ունեցայ մասնակցելու բանակումի մը, որ երկար բացակայութենէ ետք կայացաւ Հայաստանի մէջ` «Պիտի՛ վերադառնանք» խորագիրով, եւ որուն մասնակցեցան Հայ յեղափոխական դաշնակցութեան երիտասարդական եւ ուսանողական բոլոր միութիւնները:

Բանակումը անկեղծօրէն մեծապէս տպաւորիչ փորձառութիւններէս մէկն էր, լեցուն էր ուրախ պահերով, զուարճութեամբ եւ նոր ընկերութիւններով:

Կ՛արժէ նշել, թէ բանակումը յաջող էր, որովհետեւ ունէինք պատասխանատու կազմ մը, որ միշտ կազմակերպուած էր, պատասխանատու եւ ոգեւորիչ: Անոնց առաջնորդութեամբ բանակումը ունեցաւ դրական մթնոլորտ մը:

Բանակումին առիթ ունեցանք ծանօթանալու նոր ընկերներու, որոնց հետ շատ լաւ յարաբերութիւններ ստեղծեցինք: Սակայն բանակումը միայն զուարճանալու առիթ չէր, մենք ունեցանք շարք մը դասախօսութիւններ եւ քննարկումներ, որոնք մեզ աւելի խոր կերպով ծանօթացուցին մեր կուսակցութեան նպատակներուն: Այս քննարկումները եւ դասախօսութիւնները առիթ տուին մեզի հասկնալու, թէ մենք` դաշնակցական երիտասարդներս, ի՛նչ մեծ արժէք կրողներ ենք, որովհետեւ չկայ իրաւունք մը, որ կը մեռնի, երբ անոր տէր երիտասարդութիւն կայ:

Դաշնակցութիւնը պարզ կուսակցութիւն մը չէ՛, ան գաղափար մըն է, շարժում մըն է, որ մեր ժողովուրդի պատմութեան մէջ խոր արմատներ ունի: Դաշնակցութիւնը սերունդներու պայքարի եւ զոհողութեան մարմնացումն է: Ան մեզ կը միացնէ ոչ միայն որպէս հայ, այլ` որպէս գիտակից ու գործուն մասնակցող անդամներ հայ ժողովուրդի արդար Դատի իրականացման գործին:

Այս բանակումը եղաւ վերամիացում` մեր ազգային եւ քաղաքական ինքնութեան հետ: Զգացի, որ Դաշնակցութիւնը միայն կուսակցութիւն մը չէ, այլ հզօր կապ մըն է, որ մեզ կը միացնէ առանց տարբերութեան` թէ ուրկէ՛ ենք, այդ մէկն է, որ մեզ դարձուց մէկ բռունցք, միշտ պատրաստ` հասնելու մեր ժողովուրդին, մեր գաղութներուն ու մեր հայրենիքին:

Այս փորձառութէնէն ետք աւելի գիտակից պէտք է դառնանք մեր դերին` իբրեւ հայ երիտասարդներ, աւելի պատրաստ ըլլալով շարունակելու պայքարը եւ տարածելու այն գաղափարները, որոնք մեզ կը միացնեն:

ՄԻՐԷՅ ԺՄՄՕ
ՀՅԴ ԼԵՄ-ի «Ա. Շիրակեան» մասնաճիւղ