«Հարաւային Կովկասի Մէջ Որեւէ Աշխարհաքաղաքական Փոփոխութիւն Իրանի Համար Անընդունելի Է» Լաւրովին Կ՛ըսէ Ապտոլլահեան
Ռուսիոյ արտաքին գործոց նախարար Սերկէյ Լաւրով Մոսկուայի մէջ հանդիպում ունեցաւ Իրանի արտաքին գործոց նախարար Հիւսէյն Ամիր Ապտոլլահեանի հետ: Այս մասին հաղորդեց ԻՐՆԱ լրատու գործակալութիւնը:
Ռուսական «ՆԻՈՒԶ» կայքը կ՛աւելցնէ, որ Ապտոլլահեան ընդգծած է, որ Հարաւային Կովկասի մէջ որեւէ աշխարհաքաղաքական փոփոխութիւն Իրանի համար անընդունելի է:
Իրանի նախագահ Իպրահիմ Ռայիսին նախապէս յայտարարած էր, որ իր երկիրը երբեք պիտի չընդունի Կովկասի մէջ աշխարհաքաղաքական փոփոխութիւններ: Այս առումով, ըստ անոր, Իրան պատրաստ է նպաստելու շրջանին մէջ խաղաղութեան եւ կայունութեան ամրապնդման: Ան անդրադարձած էր 2020 թուականին Ռուսիոյ, Հայաստանի եւ Ազրպէյճանի ղեկավարներուն կողմէ ստորագրուած զինադադարի մասին եռակողմ համաձայնագիրին, որով աւարտած էր 44-օրեայ պատերազմը:
Անոր կարծիքով` զինադադարի համաձայնագիրին հաւատարիմ մնալը եւ մնացեալ հարցերուն երկխօսութեան ճամբով լուծումը կովկասեան շրջանին մէջ անվտանգութիւնն ու հանգստութիւնը վերականգնելու լաւագոյն միջոցն է:
ԹԱՍՍ լրատու գործակալութիւնը կը հաղորդէ, որ Լաւրով հանդիպումէն ետք միացեալ մամլոյ ասուլիսի ընթացքին յայտարարած է, որ Ազրպէյճանի, Հայաստանի եւ Ռուսիոյ ներկայացուցիչներէն բաղկացած եռակողմ աշխատանքային խումբը զգալի յառաջընթաց արձանագրած է Հարաւային Կովկասի մէջ փոխադրամիջոցային կապերու ապաշրջափակման խնդիրին շուրջ համաձայնութիւններու ձեռքբերման հարցին մէջ:
«Հարաւային Կովկասի մէջ առեւտրատնտեսական եւ փոխադրամիջոցային կապերու ապաշրջափակման հարցերով կը զբաղի եռակողմ խումբը` Ռուսիոյ, Ազրպէյճանի եւ Հայաստանի փոխվարչապետներուն մասնակցութեամբ: Անիկա կ՛աշխատի կանոնաւոր կշռոյթով, համաժամանակ, ի դէպ, Ազրպէյճանի եւ Հայաստանի միջեւ սահմանազատման վերաբերեալ հանդիպումներու առնչութեամբ, վերջերս տեղի ունեցան կանոնաւոր հաղորդակցութիւններ: Այս եռակողմ աշխատանքային խումբը, որ ստեղծուած է երեք ղեկավարներու 9 նոյեմբեր 2020-ի որոշումով, զգալի յառաջընթաց արձանագրած է համաձայնութիւններու ձեռքբերման հարցին մէջ: Յոյսով եմ` անոնք պիտի ձեւակերպուին շատ մօտիկ ապագային: Ամէնէն կարեւորը այն է, որ այս աշխատանքը կ՛իրականացուի ոչ թէ պարապութեան մէջ, ոչ թէ մեկուսացուած, այլ աւելի լայն փոխադրամիջոցային նախագիծերու, ներառեալ Հիւսիս-հարաւ միջանցքի նախագիծը, սերտ համատեղութեամբ, որով շահագրգռուած են նաեւ մեր իրանցի գործընկերները», ըսած է Լաւրով:
Լաւրովի համաձայն, քննարկումը վերաբերած է Ազրպէյճանի, Իրանի եւ Ռուսիոյ միջեւ Ռեշթ-Ասթարա մայրուղիի փոքր երկաթուղային հատուածի վերականգնման շուրջ ընթացող քննարկումներուն:
Ապտոլլահեան իր կարգին նշած է, որ Իրանը շատ արտօնեալ աշխարհաքաղաքական դիրք ունի:
«Փոխադրամիջոցային ուղիներու ամրապնդումը, ներառեալ Հիւսիս-հարաւ բազմազանցուած գիծերը, կ՛ընկալուին իբրեւ այս շրջանի զարգացման, ինչպէս նաեւ պարենային անվտանգութեան կարեւոր գործօն», աւելցուցած է ան:
Իրանեան դիւանագիտութեան պետը նաեւ յայտնած է Իսլամական հանրապետութեան պատրաստակամութիւնը` աւարտին հասցնելու Ռեշթ-Ասթարա անաւարտ հատուածի շինարարութիւնը:
«Ռուսական կողմին հետ սուրիացի ժողովուրդի տառապանքին վերջ տալու մեր ջանքերուն ծիրին մէջ քննարկեցինք Ասթանայի հոլովոյթը», ըսաւ ան` աւելցնելով. «Ռուսական կողմին հետ քննարկեցինք Իրաքի մէջ տիրող կացութիւնը, եւ այդտեղի դէպքերուն վերաբերեալ մեր դիրքորոշումները նոյնն են»:
«Թեհրան եւ Մոսկուա Լիպիոյ շուրջ շրջանային խորհրդակցութիւններ կը կատարեն, եւ մեր կարծիքով` լիպիացիները պէտք է իրենք ճշդեն իրենց երկրին ճակատագիրը», ըսաւ Ապտոլլահեան:
«Ստացանք (Եւրոպական Միութեան առաջարկին վերաբերեալ Իրանի պատասխանին) ամերիկեան պատասխանը եւ զայն մանրակրկիտ կերպով քննեցինք: Մենք հաւաստի երաշխիքներու պէտք ունինք», ըսաւ Իրանի արտաքին գործոց նախարարը:
Լաւրով յայտնեց. «Ռուսիան եւ Իրանը չեն ընդունիր գործելաոճը Արեւմուտքին, որ կը փորձէ Միջազգային օրէնքը փոխարինել»: «Բազմաթիւ հարցերու վերաբերեալ Իրանի եւ մեր դիրքորոշումները միեւնոյնն են», ըսաւ ան` աւելցնելով. «Մենք կը զօրակցինք հիւլէական համաձայնութեան վերականգնման եւ Իրանի դէմ հաստատուած բոլոր պատժամիջոցներու ջնջման»: