Կարեւոր աշխատանքներից մէկն առողջ, ազգային ուժերի համախմբումն է. ՀՅԴ Բիւրոյի ներկայացուցիչ Յակոբ Տէր Խաչատուրեան

Հրապարակի հարցազրոյցը ՀՅԴ Բիւրոյի ներկայացուցիչ Յակոբ Տէր Խաչատուրեանի հետ

Երէկ սկսուեց ՀՅԴ 35-րդ Ընդհանուր ժողովը, որին կը յաջորդեն արտագնայ նիստերը: Բացման արարողութեան ժամանակ ելոյթով հանդէս եկաւ ՀՅԴ Բիւրոյի ներկայացուցիչ Յակոբ Տէր Խաչատուրեանը:

– Ժողովին նախորդած 4 տարիներին Դուք եղել էք Բիւրոյի ղեկավարը, ինչպէ՞ս էք գնահատում այդ տարիները, ի՞նչ ձեռքբերումներ ունեցաք, ի՞նչ կորուստներ։
– Ձեռքբերումն այս դժուար օրերին Հայ դատի աշխատանքներն են, որովհետեւ նախորդած 4 տարիները հայութեան համար աղէտալի տարիներ էին։ Այս ամբողջ տագնապների մէջ նաեւ ի յայտ եկան միջին արեւելեան տագնապները, Լիբանանի եւ Սիրիայի հայ համայնքի կրած վնասները, բարոյահոգեբանական ապրումները սահմռկեցուցիչ էին։ Մեծ աշխատանք ենք տարել այդ համայնքներին օժանդակելու եւ ոտքի հանելու համար։ Մեր երիտասարդութիւնը մեծ աշխատանք է տարել տարբեր համայնքներում։ Ինչ վերաբերում է թերացումներին, մեզ համար թերութիւն է Արցախի այս վիճակի առումով աւելի վճռորոշ քայլեր չանելը։ Դժբախտաբար, ՀՀ իշխանութիւնների այսօրուայ դիրքորոշման պատճառով խոչընդոտւում է մեր աշխատանքը, մինչդեռ շատ աւելի մեծ ջանքեր պէտք է գործադրուէին, միասնական ջանքեր տարուէին, ինչի շնորհիւ, բնականաբար, շատ աւելի մեծ արդիւնքներ կ’ունենայինք Արցախի մասով։

– Մէ՛կ թուրք-ատրպէյճանական տանդեմը, մէ՛կ էլ ՔՊ-ականները յայտարարում են, որ Դաշնակցութիւն կուսակցութիւնը պէտք է փակուի, ինչո՞ւ։
– Ըստ երեւոյթին, փոխադարձ պայմանաւորուածութիւն կայ։ Այս իշխանութիւնը չի կարողանում մարսել մեր կուսակցութեան ազգային նկարագիրը։ Դժբախտաբար, այս իշխանութիւնը մեզ խոչընդոտում է, որովհետեւ մենք հայութեան իրաւունքները պաշտպանելու գործին ենք։ Այդ մարդը պատմական Հայաստան ու իրական Հայաստան հակադրութեան մէջ է, Արարատը փոխարինում է Արագածով, որը մեզ համար սիմպոլ չէ: Դա նշանակում է, որ իր ազգային էութիւնից հեռու է այս իշխանութիւնը, եւ դրա համար էլ հակադաշնակցական պայքար են մղում։

– Հայ դատի գրասենեակն ահռելի աշխատանք է կատարել Հայոց ցեղասպանութեան ճանաչման առումով։ Ի՞նչ մտահոգութիւն ունէք Փաշինեանի վերջին յայտարարութիւնների վերաբերեալ, որը ոմանք ընկալում են որպէս ցեղասպանութեան ուրացում։
– Նա պարզապէս արձագանգում է թուրքական երկար տարիների քարոզչութեանը։ Ցաւալի է, որ այդ արձագանգը մենք տեսնում ենք ՀՀ ղեկավարի կողմից։ Իրականութեան մէջ դժուար է կռահել, թէ ինչու է նման բան անում, բայց շատ յստակ է, որ սպասարկում է թուրքական, ատրպէյճանական շահը։ Նա ունի այն կեղծ համոզումը, որ շարունակական զիջումներով կարող է բերել խաղաղութիւն, ուստի ցեղասպանութեան հարցը խնդրոյ առարկայ դարձնելը դարձնում է զիջումների մի մաս։ Նա չի հասկանում, որ այս քայլը երկար տարիների արուած աշխատանքին հարուած է։ Կասկածի տակ դնել Հայոց ցեղասպանութիւնը, 1915-ի դէպքերը՝ միայն նպաստում են թշնամական քարոզչութեանը։

– Կարծիք կայ, որ այդ փոփոխութիւնների պատճառը Դաշնակցութեան ներսում եղած տարաձայնութիւններն են, ճի՞շդ է։
– Մեծ տարաձայնութիւններ չկան, մէկ հիմնական խնդիր կար, որ արդէն լուծուած է, այն էլ Արեւմտեան Ամերիկայի մէջ ծագած խնդիրն էր, որն այսօր այլեւս գոյութիւն չունի` հարցերը փակուած են։ Մնացեալ տարաձայնութիւնները միայն մարտավարական մօտեցումների մէջ են, որը Ժողովի բնական ընթացքն է։ Ես չեմ սպասում մեծ կոնֆլիկտ կամ մեծ երկփեղկուածութիւն։

– Ի՞նչ է սպասւում ՀՅԴ հեռուստատեսութեանը՝ «Երկիր մետիային»փակւո՞ւմ է, ֆինանսաւորում յատկացուելո՞ւ է առաջիկայում։

– Շատ մեծ տարաձայնութիւն կար հեռուստատեսութեան շուրջ, գիտէք, որ մեծ դժուարութիւններ կան։ Անշուշտ, նաեւ թիրախ է «Երկիր մետիան» այս իշխանութեան կողմից, ամէն ինչ անում են հեռուստատեսութեան աշխատանքը փճացնելու եւ նսեմացնելու համար։ Մենք մինչեւ հիմա միջոցներ ենք տուել, եւ անձամբ ես կարծում եմ, որ պէտք է շարունակենք աջակցել։ Ես չեմ կարող ասել՝ առաջիկայ 4 տարիների համար ֆինանսաւորում կը լինի, թէ ոչ Ժողովը կ’որոշի։ Անձամբ ես համոզուած եմ, որ ջանք պիտի գործադրենք, որ դա լինի։ Մետիան միակն է, որ ունի համահայկական նկարագիր եւ Հայաստանը սփիւռքին կապող օղակ է։

– Նիկոլ Փաշինեանի հեռացումն ինչպէ՞ս էք պատկերացնում: Դաշնակցութիւնը փողոցային այս տարիներին պայքար է մղել, սակայն չի յաջողել։
– Պէտք է շարունակուի, այլ տարբերակ չկայ։ Քաղաքական պայքարի պէտք է պատրաստուել, որովհետեւ մէկ տարի անց պիտի ունենանք ընտրութիւններ եւ պէտք է պատրաստուենք։ Կարեւոր աշխատանքներից մէկն առողջ, ազգային ուժերի համախմբման հարցն է եւ այլընտրանքի ձեւաւորումը։ Փաշինեանն օգտւում է այս հանգամանքից, որովհետեւ իր դէմ տեսնում է այլազան ուժեր, եւ այլընտրանք չի երեւում։ Ուրեմն պէտք է առաջիկայ տարուայ ընթացքում այլընտրանք ձեւաւորենք։

– Առաջիկայ խորհրդարանական ընտրութիւններին ՀՅԴ ԳՄ-ն մասնակցելու է նոյն կազմո՞վ, թէ՞ փոփոխութիւն էք ակնկալում։
– ԳՄ-ի ժողովը կը լինի Բիւրոյի ժողովից մի քանի ամիս յետոյ։ Այդ ժամանակ Հայաստանի կազմակերպութիւնը պիտի տայ իր ուղենիշը, խօսի ընտրական գործընթացների մասին, ձեւաւորի իր մարմինը։ Ես կարծում եմ, որ ԳՄ-ում էական փոփոխութիւններ չեն լինի։

– Դուք գո՞հ էք ԳՄ-ի այս կազմի աշխատանքներից։
– Այո, անշուշտ, եթէ գոհ չլինէինք, քայլերի կը դիմէինք, որպէսզի ուղղութիւններ փոխուէին։ Խնդիրը ներքին չէ, այլ ժողովրդին արթնացնելու, առաջ մղելու, ազգային ուժերին համախմբելու մէջ է։ Շատ դժուար գործ է, որ միամտաբար կարծեցինք, որ արագ բան է, բայց ժամանակը ցոյց տուեց, որ դժուար է։

– ՀՅԴ Հայաստանի ԳՄ ներկայացուցիչ Իշխան Սաղաթէլեանի նկատմամբ Դաշնակցութեան ներսում ի՞նչ դժգոհութիւններ, անհամաձայնութիւններ կան։
– Բացարձակ այդպէս չէ։ Ամբողջ ժողովին միասին ենք հանդէս գալիս։ Անհատները գուցէ ունեն դժգոհութիւն, բոլոր մեծ կուսակցութիւնների մէջ էլ, որտեղ տասնեակ հազարաւոր անդամներ կան, դժգոհութիւններ կը լինեն, սակայն դա ճիշդ չէ կապել ընդհանուր քաղաքական մօտեցման հետ։ Ընդհանուր առմամբ, մենք գոհ ենք Իշխան Սաղաթէլեանից։

Լիա Սարգսեան