Կայացած Է Սան Փաուլոյի Համալսարանի Հայազգի Տնօրէն Վահան Յակոբեանի Պաշտօնի Ստանձման Արարողութիւնը
Սան Փաուլոյի նահանգապետի նստավայրին (Պանտէյրանչիս պալատին) մէջ յունուար 29-ին տեղի ունեցած է Սան Փաուլոյի համալսարանի նորընտիր տնօրէն, դոկտոր-փրոֆէսոր, հայազգի Վահան Յակոբեանի պաշտօնի ստանձման հանդիսաւոր արարողութիւնը:
Ինչպէս «Հայերն այսօր»-ին կը յայտնեն ԱԳՆ մամլոյ ծառայութենէն, որ Պրազիլի խոշորագոյն համայնքի ղեկավար, նահանգապետ Ժերալտու Ալքմինը արարողութեան ժամանակ իր ելոյթին մէջ վստահութիւն յայտնած է, որ համալսարանն ի դէմս իր նոր ղեկավար կազմին պիտի շարունակէ նոր յաղթանակներ գրանցել յանուն Սան Փաուլոյի եւ Պրազիլի:
Ստանձնելով իր բարձր եւ պատասխանատու պաշտօնը` փրոֆէսոր Յակոբեան առանձնակի ընդգծած է իր հայկական ծագումը եւ ողջոյնի խօսքեր ուղղած ՀՀ դեսպանին եւ հայ համայնքի ներկայացուցիչներուն:
Յատկանշական է, որ համալսարանի Արեւելագիտութեան բաժանմունքին մէջ կը գործէ նաեւ Հայագիտութեան ամպիոնը:
Աղբիւրը կը յայտնէ, որ ներկաներու շարքին եղած են Պրազիլի եւ Սան Փաուլօ նահանգի բարձրաստիճան պաշտօնեաներ, երկրի մտաւորականութեան ընտրանին, ԶԼՄ-ներ, համալսարանի դասախօսներ եւ ուսանողներ: ՀՀ դեսպան Աշոտ Գալոյեանի առաջնորդութեամբ ձեռնարկին մասնակցած են նաեւ հայկական համայնքային կառոյցներու ներկայացուցիչներ:
Վահան Յակոբեան ծնած է 1951 թուականին Պոլիս: 1974 թուականին աւարտած է Սան Փաուլոյի համալսարանի բազմարուեստեան դպրոցը, իսկ 1978 նոյն դպրոցի քաղաքաշինութեան բաժանմունքը: 1982 թուականին թեկնածուական ատենախօսութիւնը պաշտպանած է Լոնտոնի Քինկս քոլեջ համալսարանին մէջ:
1975 թուականէն ի վեր, փրոֆէսոր Յակոբեանի գիտամանկավարժական գործունէութիւնը ընթացած է Սան Փաուլոյի համալսարանին մէջ: Աշխատանքային գործունէութեան ընթացքին գրաւած է բազմաթիւ պաշտօններ` հանդիսացած է Փոլիտեխնիկական դպրոցի տնօրէնի տեղակալը, Սան Փաուլօ նահանգի արհեստագիտական հետազօտութիւններու բաժանմունքի տնօրէնը, Սան Փաուլօ նահանգի գիտութեան եւ արհեստագիտութիւններու քարտուղարութեան համակարգողը, շինարարութեան ոլորտին մէջ հետազօտութիւններու միջազգային խորհուրդի նախագահ եւ այլն: 2010-2014թթ համապատասխանաբար գրաւած է համալսարանի փոխ-տնօրէնի պաշտօնը: Համալսարանի կանոնադրութեան համաձայն Վահան Յակոբեան պիտի պաշտօնավարէ մինչեւ 2022 թ.:
Սան Փաուլոյի համալսարանը հիմնադրուած է 1934 թուականին եւ կը հանդիսանայ ոչ միայն Պրազիլի ամենահեղինակաւոր համալսարանը, այլեւ մեծ հեղինակութիւն կը վայելէ ամբողջ տարածաշրջանին մէջ: Անցած 84 տարիներուն ընթացքին գիտութեան եւ կրթութեան ոլորտներուն մէջ համալսարանը գրանցած է բազմաթիւ յաջողութիւններ եւ ձեռքբերումներ:
Հիմնադրման առաջին իսկ օրերէն համալսարանը հանդիսացած է երկրի մտաւոր ընտրանիի ձեւաւորողը եւ կառավարող էլիտայի դարբնոցը: Համալսարանին կը պատկանի երկրի ընդհանուր գիտարուեստական արդիւնքի 22%-ը, ասպիրանտներու` 13,2%-ը, գիտութիւններու դոկտորներու` 15.5%-ը, ինչպէս նաեւ մագիստրոսներու 7.6%-ը: Համալսարանը ստորագրած է 1600 արձանագրութիւն եւ պայմանագիր իր ազգային եւ միջազգային գործընկերներուն հետ: