Եւրոպայի սոցիալիստների կուսակցութիւնը Ատրպէյճանին կոչ է անում ապահովել արցախահայութեան վերադարձն ու Արցախի մշակութային ժառանգութեան պաշտպանութիւնը

Ամսթերտամում ընթացող Եւրոպայի սոցիալիստների կուսակցութեան քոնկրէսն այսօր ընդունել է մի շարք բանաձեւեր, որտեղ տեղ են գտել ՀՅ Դաշնակցութեան կողմից ներկայացուած դրոյթներ։

Մասնաւորապէս՝ Եւրոպայի սոցիալիստների կուսակցութիւնը Ատրպէյճանին կոչ է արել ազատ արձակել բոլոր հայ գերիներին, թոյլատրել արցախահայութեան վերադարձը միջազգային մոնիթորինկի պայմաններում, ապահովել հայկական մշակութային ժառանգութեան պաշտպանութիւնը։ Ընդունուած բանաձեւով նաեւ կարեւորւում է Հայաստանի ժողովրդավարական զարգացումների շարունակական մոնիթորինկը՝ ներառեալ օրէնքի գերակայութիւնը, դատական անկախութիւնը եւ քաղաքական ազատութիւնների պաշտպանութիւնը։

Քոնկրէսի որդեգրած բանաձեւերից «Խաղաղութեան, բարօրութեան եւ ներառականութեան խթանումը Եւրոպայում եւ նրա հարեւան տարածաշրջաններում» բանաձեւում, Եւրոպայի սոցիալիստների կուսակցութիւնը ասում է.

«Մենք վերահաստատում ենք մեր աջակցութիւնը բոլոր այն միջազգային ջանքերին, որոնք ուղղուած են խաղաղութեան, անվտանգութեան եւ կայունութեան ապահովմանը Հարաւային Կովկասում, մասնաւորապէս՝ Հայաստանում ԵՄ քաղաքացիական առաքելութեան տեղակայման միջոցով։

Ատրպէյճանը պէտք է ազատ արձակի բոլոր հայ գերիներին, ապահովի Լեռնային Ղարաբաղի հայերի անվտանգ վերադարձը՝ միջազգային վերահսկողութեան ներքոյ, եւ պահպանի տարածաշրջանի հայկական մշակութային ժառանգութիւնը։ Մենք վերահաստատում ենք մեր աջակցութիւնը Ատրպէյճանի ժողովրդավարական ընդդիմութեանը։ Մենք ընդգծում ենք Հայաստանի ներքին ժողովրդավարական գործընթացների շարունակական մոնիթորինկի կարեւորութիւնը, ներառեալ՝ օրէնքի գերակայութիւնը, դատական անկախութիւնը եւ քաղաքական ազատութիւնների պաշտպանութիւնը»։

Քոնկրէսը PES-ի բարձրագոյն ժողովն է, որտեղ քննարկւում է համաեւրոպական այս խոշոր կուսակցութեան նախընթաց գործունէութիւնը, որոշւում ռազմավարական եւ ծրագրային քաղաքական առաջնահերթութիւնները, ընտրւում է կուսակցութեան նոր գործադիր մարմին։

PES- ին իբրեւ լիիրաւ անդամ անդամակցում են եւրոպական 33 կուսակցութիւններ, իբրեւ ասոցացուած՝ 13, իսկ դիտորդ անդամների թիւը 15-ն է։ Անդամակցութեան կարգավիճակը կախուած է Եւրոպական միութեան հետ պատկան երկրի յարաբերութիւնների բնոյթից։ ՀՅ Դաշնակցութիւնը մեր տարածաշրջանում PES-ին անդամակցող միակ քաղաքական ուժն է։

Այս կուսակցութեան հետ միջկուսակցական կապերի շարունակական զարգացումը ՀՅ Դաշնակցութեան արտաքին յարաբերութիւնների կարեւոր ուղղութիւններից մէկն է։

ՀՅ Դաշնակցութեան պատուիրակութիւնը ներկայացնում են Գասպար Կարապետեանը, Սարինէ Աբրահամեանը, Գէորգ Ղուկասեանը, Նարօտ Նորամանեանը։ Նախատեսւում է ՀՅԴ պատուիրակութեան ակտիւ մասնակցութիւնը Քոնկրէսի աշխատանքներին, հանդիպումներ բազմաթիւ երկրների սոցիալիստական, սոցիալ-դեմոկրատական եւ աշխատաւորական կուսակցութիւնների ներկայացուցիչների հետ, փոխադարձ հետաքրքրութիւն ներկայացնող հարցերի լայն շրջանակի քննարկում։

ՀՅԴ Բիւրոյի հանրային կապերի գրասենեակ

17 Հոկտեմբերի 2025